कोरियाली राष्ट्रपतिले पठाए प्रम देउवालाई बधाई सन्देश
हाम्रा कुरा
प्रकाशित २०७८ साउन १६ शनिबार
303
Shares
काठमाडौँ । कोरियाली राष्ट्रपति मुन जे इनले प्रधानमन्त्री शेरबहादुर देउवालाई बधाई दिएका छन् । नेपाली काङ्ग्रेसका सभापति देउवा नेपालको प्रधानमन्त्री नियुक्त भएकामा गणतन्त्र कोरियाका राष्ट्रपति इनले हार्दिक बधाई ज्ञापन गर्दै कार्यकालको सफलताको कामना गरेका हुन् ।
परराष्ट्र मन्त्रालयको समेत कार्यभार सम्हालेका प्रधानमन्त्री देउवालाई राष्ट्रपति मुनले पठाएको बधाई सन्देश नेपालका लागि कोरियाका राजदूत पार्क चोङ सुकले शुक्रवार हस्तान्तरण गरे।
बधाई सन्देशका निम्ति कोरियाली राष्ट्रपतिमा आभार व्यक्त गर्दै प्रधानमन्त्री देउवाले नेपाल र कोरियाबीचको मैत्रीपूर्ण सम्बन्धलाई अझ सुदृढ तुल्याउन राष्ट्रपति मुनसँग सहकार्य गर्न आफू उत्सुक रहेको बताएका छन् । कोरियाका राजदूतसँग द्विपक्षीय सम्बन्ध प्रवद्र्धन गर्नेबारेमा प्रधानमन्त्रीले विचारविमर्श गर्नुभएको परराष्ट्र मन्त्रालयले जनाएको छ ।
शुक्रवारै प्रधानमन्त्री देउवासँग नेपालका लागि पाकिस्तानका राजदूत सैयद हैदर शाहले शिष्टाचार भेट गरे । त्यस अवसरमा उनीहरूबीच पारस्परिक हितका विषयसहित कोभिड–१९विरुद्धको सहयोग एवम् ऐक्यबद्धता, द्विपक्षीय व्यापार, लगानी र पर्यटन प्रवद्र्धनबारे छलफल भएको उक्त मन्त्रालयले जनाएको छ ।
