दार्चुला । जिल्ला अस्पताल दार्चुलामा अक्सिजन प्लान्ट जडानमा ढिलाइ भएको छ । गत असारभित्र प्लान्ट निर्माण सम्पन्न गर्ने गरी हेल्थ केयर सप्लायर्स काठमाडौंसँग सम्झौता भएको भए पनि कम्पनीले हालसम्म प्लान्ट जडानको काम शुरु गरेको छैन । कोरोनाको दोस्रो लहर भित्रिदा देशैभर अक्सिजनको अभाव भएपछि अस्पतालमै अक्सिजन उत्पादन गर्ने उद्देश्यले सुदूरपश्चिम प्रदेश सरकारको लगानीमा जिल्ला अस्पताल दार्चुलामा अक्सिजन प्लान्ट जडान गर्ने योजना अघि बढेको थियो । 

अस्पतालले जेठ अन्तिमतिर इ-बिडिङको माध्यमबाट १५ दिने बोलपत्र आह्वान गरी असारभित्र प्लान्ट खरिद गर्ने र जडान गर्ने भने पनि सामान नआउँदा ढिलाइ भएको जिल्ला अस्पताल व्यवस्थापन समिति अध्यक्ष दलजित सिंह धामीले बताए ।

अक्सिजन प्लान्ट जडान नहुँदा जटिल अवस्थाका कोरोना संक्रमितलाई बाहिरी जिल्ला रेफर गर्नुपर्ने बाध्यता अस्पताल सँग छ । बोलपत्र आह्वान गरी सप्लायर्स छनोट गरेको भए पनि हालसम्म पनि जडानको काम शुरु नभएको अस्पतालका प्रमुख डा. आदर्श लिम्बुले बताए ।

गत आर्थिक वर्षको असारभित्र प्लान्ट स्थापना गर्ने भनेर अस्पताल र कम्पनीबीच सम्झौता भएको, यसपछि कम्पनीले प्लान्ट जडानका लागि १५-२० दिन थप गरिदिन निवेदन दिएको थियो ।

 ‘१५-२० दिन थप गरेको अवधिमा पनि प्लान्ट जडानको काम शुरु भएको छैन,’ डा. लिम्बुले भने, ‘कम्पनीले थप १५-२० दिनको समय मागेको छ । कम्पनीसँग सम्पर्क गर्दा चीनबाट सामग्री मगाएका छौं, अझै नेपालमा पुगेको छैन भन्ने जवाफ आएको छ ।’ कम्पनीसँग प्लान्ट जडानका लागि ७० लाखमा ठेक्का सम्झौता भएको हो ।

अक्सिजन प्लान्ट जडान नहुँदा अक्सिजन सिलिण्डर भर्न नेपालगन्ज पठाउनु पर्ने बाध्यता भएको अस्पतालले जनाएको छ । जिल्ला अस्पताल दार्चुलामा अहिले ७० सिलिन्डर छन् भने ४७ कन्सन्ट्रेटर छन् । दुई जना कोरोनाका बिरामी अहिले उपचाररत छन् । “प्लान्ट जडान भए सङ्क्रमितको उपचारमा सहयोग पुग्थ्यो, उनले भने, अहिले जटिल समस्या भएका बिरामीहरूलाई नेपालगन्ज र सुर्खेत रेफर गर्नुको विकल्प छैन ।”