काठमाडौं । नेपाली पौडीबाजले अहिलेसम्म दक्षिण एसियाली खेलकुदमा पनि राम्रो प्रभाव जमाउन सकेका छैनन् । त्यस्तोमा १३ वर्षे गौरिका सिंहले गत फागुनमा चमत्कार गरिन् । भारतमा भएको १२ औं दक्षिण एसियाली खेलकुद सागमा भारतमा गौरिकाले एक रजत र तीन कास्यपदक जितेर कीर्तिमान रचिन् ।
नेपाली पौडीको इतिहासमा यी फुच्चीको सबैभन्दा ठूलो सफलता हो । यो फुच्ची जलपरीले नेपालमामात्र होइन विश्वमै कीर्तिमान रच्ने सम्भावना बढेको छ । त्यो पनि ओलम्पिक खेलकुदमा ।
उनी ब्राजिलको रियो दि जेनेरियोमा हुँदै गरेको रियो ओलम्पिककी सबैभन्दा कान्छी खेलाडी हुन् । कान्छी खेलाडी भएको भन्दै खुवै प्रशंसा पनि गरेका छन् । अन्तर्वार्तासमेत लिएका छन् । उनले अचम्म मान्दै खुसीसमेत ब्यक्त गरिरहेकी छिन् ।
हुनत पौडीको बेस बन्ने समय नै यही हो । यो समयलाई गौरिकाले खुवै प्रयोग गरेकी छिन् । नेपाली पौडीका ज्ञाताहरु भन्छन् –गौरिका नेपालमै भएको भए यतिराम्रो प्रदर्शन हुने थिएन ।
उनी बेलायतमा बस्छिन् । बेलायतमै दैनिक अभ्यास गर्छिन् । लण्डनको मिलहिलस्थित बार्नेट कोपथल पौडीपोखरीमा गौरिकाको अभ्यास चल्छ । उनी दिनको दुईपटक पाँच घण्टासम्म, सातामा ७० किलोमिटरसम्म त्यही पौडीपोखरीमा ओहोरदोहोर गर्ने उनको परिवारले बताएको छ ।
उनले जुन मेहनत बेलायतमा बसेर गरेकी छिन् त्यो सबै ब्यक्तिगत खर्चमै हो । ओलम्पिकको सपना चाँडै पूरा भएकामा उनले खुसी पनि व्यक्त गरेकी छिन् । उनी भन्छिन् –‘इट इज ह्युज प्लेटफर्म फर मी’ (यो मेरालागि ठूलो अवसर हो) ।
गत वर्ष २० औं राष्ट्रिय पौडी प्रतियोगिताका लागि काठमाडौं आएकी गौरिकाले त्यसपछि पछाडि फर्किनु परेको छैन । उनले पहिलो सहभागीतामै छ वटा राष्ट्रिय कीर्तिमान बनाएर सबैको मन जितिन् ।
सोही आधारमा उनी भारतमा भएको १२ औं सागमा पनि छानिइन् । सागमा यसअघि औपचारिकतामै सीमित देखिएको नेपालले यसपटक गौरिकाको प्रदर्शनले कायापलट ग¥यो । धेरै नेपाली हेरेको हे¥यै भए ।
अर्थात् धेरैले एउटै बाक्य निकाले ‘फुच्चीले कमालको प्रदर्शन गरी’ । गौरिकाले १ रजत र ३ कांस्यपदक जितिन् । पौडीको व्यक्तिगत इभेन्ट्समा गौरिकामार्फत नेपालले पहिलोपटक रजतपदक जितेको हो ।
नेपाली पौडीको यो पदक अहिलेसम्मकै ऐतिहासिक हो । यो कीर्तिमान राखेकी गौरिका त्यत्तिकै रोकिएकी छैनिन् । उनले रजत जितेसंगै भनेकी थिइन् –‘अब नेपालमै हुने १३ औं सागमा स्वर्ण जित्छु ।’
यो दृढ इच्छाशक्तिले नै गौरिकालाई रुसको कजानमा विश्व च्याम्पियनसिपमा लग्यो । १०० मिटर ब्याकस्ट्रोकमा १ मिनेट ०८.२३ सेकेन्डमा खेल सकिन् । नेपालबाट सबैभन्दा बढी फिना अंक ल्याएर गौरिकाले रियो ओलम्पिकका लागि वाइल्ड कार्ड पाइन् ।
गौरिकाले सागमा भने कास्यपदक जित्दा १ मिनेट ०७.३१ सेकेन्डको राष्ट्रिय कीर्तिमान बनाएकी थिइन् । कीर्तिमानकी खानी गौरिकाले अहिलेसम्म ३२ वटा राष्ट्रिय कीर्तिमान आफ्नो नाममा लेखाइसकेकी छिन् ।
रियो ओलम्पिकमा उनको चुनौती अहिलेसम्मकै उत्कृष्ट प्रदर्शन गर्ने हो । उनको लक्ष्य कम्तीमा १ मिनेट ०६ सेकेन्डमा दूरी सकाउने छ ।
उनले विगत छ महिनादेखि निकै कठिन अभ्यास गरिरहेकी छिन् । उनको परिवार वाइल्ड कार्ड भन्दा पनि दक्षिण एसियाबाट सीधै ओलम्पिकमा छनोट हुने सपना देख्दैछ ।
अहिलेलाई उनले एउटा प्लेटफर्म बनाए पनि अर्को ओलम्पिकका लागि भने परिवारको सोच अर्कैै छ । त्यो हो समयलाई १ मिनेट ०१ सेकेन्डमा झार्ने अनि ओलम्पिकमा सीधै छनोट हुने । दक्षिण एसियामा अहिलेसम्म कसैले पनि पौडीमा सीधै छनोट भएको घटना छैन ।
नेपालमै बसेको भए उनले यो सफलता हासिल गर्लिन् र भनी हावामा उडाउन सकिन्थ्यो होला । तर उनी त बेलायतमा छिन् त्यो पनि सुविधा सम्पन्न पौडीपोखरीमा अभ्यास गरिरहेकी छिन् । उनका बाबुले पनि उनका लागि खुवै लगानी गरेका छन् । यो अर्थमा पनि गौरिकाले नेपालका नाममा केही गर्छिन् भन्ने भरोसा छ ।
गौरिकाले १०० मिटर ब्याकस्ट्रोकको प्रतिस्पर्धा साउन २३ गते आइतबार खेल्दैछिन् । नेपाली एउटै प्रतिक्षामा बसेका छन् कि गौरिकाले कति छिट्टै पौडी सकाएर अर्को राष्ट्रिय कीर्तिमान बनाउलिन् ।
उनी नेपालमा शान्ति शिक्षा अभियानको सद्भावना दूत पनि हुन् । हरेक राष्ट्रिय कीर्तिमान बनाएपछि उनलाई राष्ट्रिय खेलकुद परिषदले पाँच हजार रुपैयाँ दिने गर्छ ।
त्यो रकम उनले गैरसरकारी संस्थालाई विद्यालय भवन बनाउन दिन्छिन् । सो संस्थाले रियो ओलम्पिकमा कतिबेला गौरिकाले कीर्तिमान बनाउलिन् भनेर कुरेको छ । गौरिका पनि सहयोग गर्न आतुर छिन् ।
विगत चार वर्षदेखि निरन्तर पौडी खेल्न थालेकी गौरिकालाई यति कम उमेरमै बनाएको कीर्तिमान र खेल सुधारका लागि धेरै धेरै शुभकामना ।
