प्रधानमन्त्री देउवासँग चिनियाँ परराष्ट्रमन्त्री वाङको भेटवार्ता
रासस,
प्रकाशित २०७८ चैत १२ शनिबार
1k
Shares
तस्बिर : रासस
काठमाडौँ। प्रधानमन्त्री शेरबहादुर देउवासँग चीनका राज्यपरिषद् सदस्य एवं परराष्ट्रमन्त्री वाङ यीले शिष्टाचार भेटवार्ता गरेका छन्। प्रधानमन्त्री निवास बालुवाटारमा आज साँझ एक घण्टा भएको भेटमा उनीहरूबीच द्विपक्षीय आपसी हितका विविध विषयमा कुराकानी भएको परराष्ट्रमन्त्री डा.नारायण खड्काले जानकारी दिए।
भेटमा नेपाल र चीनबिचको सम्बन्ध पुरानो तथा मैत्रीपूर्ण रहेको,अन्तर्राष्ट्रिय मञ्चमा दुवै देशले एक अर्काका चासो र हितका विषयमा समर्थन गर्नेलगायत विषयमा कुरा उठान भएको उनले बताए।
चीनसँगको नेपालको व्यापार घाटा,चीनसँगका तातोपानी र रसुवा नाका सञ्चालन गर्ने,चीनमा अध्ययनरत नेपाली विद्यार्थीको अध्ययन कोभिडका कारण पूरा हुन नसकेको अवस्थामा त्यसलाई सहजता बनाउने लगायत विषयमा पनि दुवै पक्षबिच सौहार्द रूपमा छलफल भएको थियो। सोही अवसरमा पोखरा विमानस्थलमा चीनको ऋण सहयोगमा चिनियाँ पक्षले सम्पन्न गरेको प्राविधिक पक्षको काम नेपाललाई हस्तान्तरण गरिएको छ।
परराष्ट्रमन्त्री डा.खड्काको मैत्रीपूर्ण निमन्त्रणामा तीन दिने नेपाल भ्रमणमा आएका परराष्ट्रमन्त्री वाङ शुक्रवार यहाँ आइपुगेका हुन्। दुवै देशका परराष्ट्रमन्त्रीबीच आजै द्विपक्षीय वार्तापछि दुवै देशका सम्बद्ध अधिकारीले पारस्परिक सहयोग अभिवृद्धि गर्नेसम्बन्धी नौ वटा समझदारीमा हस्ताक्षर पनि गरेका छन्।
