काठमाडौं । प्रधानमन्त्री शेरबहादुर देउवाले नेपालले त्रिकोणात्मक टी–२० क्रिकेट शृंखला जितेपछि नेपाली पक्रकेट टीमलाई बधाई दिएका छन् । सामाजिक संजालमार्फत देउवाले नेपाली टिमलाई बधाई दिएका हुन् ।
दिपेन्द्र सिंह ऐरीको अलराउण्ड प्रदर्शनले नेपालले काठमाडौंमा सम्पन्न त्रिकोणात्मक टी–२० अन्तर्राष्ट्रिय क्रिकेट श्रृंखलाको उपाधि जितेको छ । सोमबार त्रिवि क्रिकेट मैदान कीर्तिपुरमा सम्पन्न फाइनलमा पपुवा न्यूगिनीलाई ५० रनले हराउँदै मलेसियासमेत सम्मिलित रहेको प्रतियोगिताको उपाधि नेपालले जितेको हो ।
ऐरीले यो खेलमा ३८ बलमा अविजित रहँदै ५४ रन बनाए भने १८ रन खर्चेर ४ विकेट लिए । विरलै हुने यो अलराउण्ड प्रदर्शनले उनले नेपाललाई सजिलै उपाधि दिलाएका हुन् ।
त्यसैगरी ऐरीले टी–२० अन्तर्राष्ट्रियमा एक हजार रन पूरा गरेका छन् । सोमबार २१ रन थपेपछि उनले एक हजार रन पूरा गरेका थिए । एक हजार रन पूरा गर्ने उनी पहिलो नेपाली हुन् ।
त्यस्तै उनले ३८ खेलको ३४ इनिङ्सबाट एक हजार रन पूरा गरेसँगै चर्चित टी–२० का हस्तीहरु वेष्ट इन्डिजका क्रिस गेल, न्यूजिल्याण्डका केन विलियमसन र श्रीलंकाका कुशल परेराकोसमेत बराबरी गर्दै विश्वको दशौं स्थानमा रहन सफल भएका छन् ।
फाइनल खेलको नेपालको इनिङ्स
टस हारेर पहिले ब्याटिङ्ग गरेको नेपालले ६ विकेटको क्षतिमा १६८ रन बनायो । दिपेन्द्र सिंह ऐरीले ३८ बलमा अविजित रहँदै ५४ रन बनाए ।
त्यस्तै करण केसीले १२ बलमा अविजित रहँदै ३३ रन बनाए । आसिफ शेखले २९ बलमा २९ तथा कुशल भुर्तेलले २२ बलमा २५ रन बनाए । मोहम्मद आदिल आलमले १५ बलमा १५ रन बनाए ।
सेमो कामेअले ३ विकेट लिए ।
पीएनजीको इनिङ्स
१६९ रनको चुनौती पछ्याएको पीएनजीले १६।१ ओभर क्रिजमा रहेर ११८ रन बनाएर अलआउट भयो ।
सेसे बाउले सर्वाधिक ५९ रन बनाए । उनले ३८ बलको सामना गरेका थिए । त्यस्तै चार्लस एमिनीले १५ रन बनाए ।
त्यसबाहेक कुनै पनि खेलाडीले दोहोरो स्कोर खडा गर्न सकेनन् । तीन खेलाडीले रनको खातासमेत खोल्न सकेनन् ।
नेपालका लागि अलराउण्ड प्रदर्शन गर्ने क्रममा दिपेन्द्र सिंह ऐरीले ४ ओभरमा १८ रन खर्चेर ४ विकेट लिए ।
करण केसीले पनि अलराउण्ड खेल्दै ३ ओभरमा २७ रन खर्चेर ३ विकेट लिए । कप्तान सन्दीप लामिछानेले २५ रन खर्चेर २ विकेट लिए । एक खेलाडी रन आउट भए ।
समग्रमा श्रृंखला
योसँगै नेपालले सहजै उपाधि जितेको हो । नेपालले श्रृंखलामा खेलेका सबै पाँच खेल जितेर अपराजित यात्रा कायम राखेको छ ।
नेपालले फाइनलअघिको खेलमा चारै खेल जितेको थियो । सो क्रममा मलेसिय र पीएनजीलाई दुवै खेलमा हरायो । मलेसिया र पीएनजीले एक एक खेल जितेकामा रन रेटका आधारमा पीएनजीले उपाधिका लागि फाइनल खेल्ने अवसर पाएको थियो ।
यसअघि भएको एक दिवसीय श्रृंखलाका दुवै खेलमा पराजित भएर घरेलु मैदानमै आईसीसी वरीयतासमेत घटाएको नेपालले टी–२० श्रृंखला जित्दै पीएनजीमाथि बदला लिनसमेत सफल भएको छ ।
दिपेन्द्र प्लेयर अफ द सिरिज घोषित भएका छन् । दिपेन्द्रले ५ खेल खेल्दै एक शतकसहित कुल २ सय ५५ रन जोड्दा ७ विकेट लिएका थिए ।
करण केसी उत्कृष्ट बलर चुनिएका छन् । करणले ५ खेलमा १३ विकेट लिए ।
