विश्वकपका लागि खेलाडी छनोट– यु–१९ लिगमा निलो टोली विजयी

प्रकाशित मिति : २०७२ मङ्सिर १५ मंगलबार
काठमाडौँ । उन्नाइस वर्षमुनि (यु–१९) लिग क्रिकेट प्रतियोगिताअन्तर्गत यु–१९ निलो टोलीले यु–१९ हरियो टोलीलाई ८१ रनले पराजित गरेको छ । कीर्तिपुरस्थित त्रिवि क्रिकेट मैदानमा आज भएको खेलमा टस जितेर पहिलो ब्याटिङ गरेको निलोले निर्धारित ५० ओभरको खेलमा पूरै ओभर खेल्दै ९ विकेटको क्षतिमा २२९ रन बनायो । जवाफी ब्याटिङमा आएको हरियो ४२.४ ओभरमै सबै विकेट गुमाएर १४८ रन मात्र बनाउन सक्यो । 
 
निलोलाई सहज जित दिलाउन पवन थापाले ४९, सन्दीप सुनारले ४५, कप्तान आरिफ शेखले ३५, इशान पाण्डेले २३, आशिफ शेखले २० तथा अरुण ऐरीले अविजित रहँदै १४ रनको योगदान गरेका थिए । त्यस्तै, कप्तान आरिफले ४, इर्शाद अहमदले ३, रिजन ढकालले २ तथा दीपेश श्रेष्ठले १ विकेट लिएपछि हरियो टोली पराजित भयो । 
 
हरियोका कुशल भुर्तेलले २४ र हिमांशु दत्तले ३१ रन तथा अविनाश बोहरा र ललित राजवंशीले २-२ विकेट लिए पनि हार टरेन । आजको जितले ४ अङ्क बनाएको निलो टोली समान अङ्क बनाएको रातो टोलीसँगै लिगको शीर्ष स्थानमा छ भने हरियो टोलीले २ अङ्क मात्र जोडेको छ । यो प्रतियोगितामा उत्कृष्ट प्रदर्शन गर्ने खेलाडीले आगामी जनवरीमा बङ्गलादेशमा हुने यु–१९ विश्वकपका लागि बन्ने टोलीमा ठाउँ बनाउने नेपाल क्रिकेट सङ्घ (क्यान)ले जनाएको छ ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ