नेपालले भुटानसँग भन्दा कुवेतसँग बनायो बढी रन, कुवेत एक सय आठ रनको चुनौती पछ्याउँदै
हाम्रा कुरा
प्रकाशित २०७९ असार ४ शनिबार
609
Shares
काठमाडौं । मलेसियामा जारी एसीसी महिला टी–२० च्याम्पियनशिप क्रिकेटमा नेपालले कुवेतसँग खेलिरहेको छ । जितका लागि नेपालले कुवेतलाई १ सय ८ रनको लक्ष्य दिएको छ।
किन्रारा ओभलमा टस हारेर पहिले ब्याटिङ गरेको नेपालले २० ओभरमा ४ विकेट गुमाएर १ सय ७ रन बनायो । नेपालका लागि कप्तान रुबिना क्षेत्रीले सर्वाधिक ३४ रन जोडिन् । उनले अविजित रहँदै २७ बलमा उक्त योगफल बनाएकी हुन् ।
यस्तै इन्दू बर्माले ३३ बलमा अविजित रहँदै २८ रन बनाइन् । ज्योती पाण्डेले १५, बिन्दू रावलले ११ रन बनाइन् ।
नेपाल लगातार दोस्रो जित निकाल्ने योजनामा रहेको छ । यसअघि पहिलो खेलमा शुक्रबार भएको पहिलो खेलमा नेपालले भुटानलाई ५० रनले हराएको थियो ।
कुवेतविरुद्धको यस अघिको दुई भेटमा नेपालले जित निकालेको थियो ।
च्याम्पियनसिपमा नेपाल समूह बी मा रहेको छ । नेपालको समूहमा हङकङ, कुवेत, भुटान र बहराइन रहेका छन् ।
अब नेपालले सोमबार बहराइन र अन्तिम खेलमा मंगलबार हङकङसँग खेल्नेछ।
च्याम्पियनशिपमा १० टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ।
समूह चरणको खेलपछि शीर्ष दुई टोलीले सेमिफाइनलमा स्थान बनाउने छन् ।
च्याम्पियनशिपको फाइनल पुग्ने दुई टोली महिला टी–२० एसिया कप क्रिकेटमा छनोट हुनेछ ।
