लगातार तीन जितसहित नेपाल एसीसी महिला टी–२० च्याम्पियनशिपको सेमिफाइनलमा
हाम्रा कुरा
प्रकाशित २०७९ असार ६ सोमबार
225
Shares
काठमाडौं । नेपाल मलेसियामा जारी एसीसी महिला टी–२० च्याम्पियनशिप क्रिकेटको सेमिफाइनलमा प्रवेश गरेको छ । किन्रारा ओभलमा सोमबार बहराइनलाई ८ विकेटले हराउँदै नेपाल सेमिफाइनलमा पुगेको हो ।
बहराइनले दिएको १५ रनको झिनो लक्ष्य नेपालले ३.४ ओभरमा २ विकेट गुमाएर पूरा गर्यो । नेपालका लागि सीता राना मगरले ४ रन जोडिन् । कविता कुँवरले अविजित ३ रन बनाइन् । इन्दू बर्मा रन नबनाइ पभेलियन फर्किएको इनिङ्समा कप्तान रुबिना क्षेत्री रनको खाता नखोली अविजित रहिन् ।
नेपालले ८ रन अतिरिक्तका रुपमा पाएको थियो । बहराइनकी पभिथ्र सेट्ठी र भिल्सिटा बार्बोजाले एक एक विकेट लिए ।
त्यसअघि पहिले ब्याटिङ गरेको बहराइनले निर्धारित ७ ओभरमा ६ विकेट गुमाएर १४ रन बनाएको थियो । वर्षाको कारण ७ ओभरमा झारिएको खेलमा
बहराइनकी इशारा सुहुनले ६ रन जोडिन् । कप्तान दिपिका रासंगिका र थरंगाले २–२ रन जोडिन् ।
नेपालकी कविता कुँवर र सबनम राईले २–२ तथा अश्मिना कर्माचार्यले १ विकेट लिइन् ।
समूह ‘बी’ मा रहेको नेपाल शीर्ष स्थानमा रहेको छ । नेपालले ३ खेलमा ६ अंक जोडेको छ । नेपाल एक खेलअघि नै सेमिफाइनलमा पुगेको हो ।
जारी प्रतियोगिताको पहिलो खेलमा नेपालले भुटानलाई ५० रनले तथा दोस्रो खेलमा कुवेतलाई २५ रनले हराएको थियो । नेपालले अन्तिम खेलमा मंगलबार हङकङसँग खेल्नेछ।
