सेमिफाइनल खेल वर्षाले रद्द भएपछि नेपालको एसिया कप खेल्ने सपना अधुरै
हाम्रा कुरा
प्रकाशित २०७९ असार १० शुक्रबार
447
Shares
काठमाडौं । नेपाली महिला क्रिकेट टोलीको एसिया कप क्रिकेट खेल्ने सपना अधुरै रहेको छ । मलेसियामा जारी एसीसी महिला टी–२० च्याम्पियनशिपको सेमिफाइनलबाटै बाहिरिएपछि नेपालले एसिया कप खेल्ने सपना अधुरै रहेको हो ।
वर्षाका कारण संयुक्त अरब इमिरेट्स (यूएई) विरुद्धको खेल रद्द भएपछि नेपाल सेमिफाइनलबाटै बाहिरिएको हो । खेलमा नेपालले उत्कृष्ट बलिङ गरे पनि जवाफी ब्याटिङ गर्न नपाएपछि समूह चरणको खेलको आधारमा नेपाल बाहिरिएको हो ।
नेपाल समूह चरणमा उपविजेता बन्दै तथा यूएई समूह विजेता बन्दै सेमिफाइनलमा पुगेको थियो ।
बिहानको खेलमा टस जितेर पहिले ब्याटिङ गरेको नेपालले यूएईलाई ८१ रनमा रोक्न सफल भएको थियो । यूएई एक बल खेल्न बाँकी छँदै अलआउट हुन पुगेको थियो ।
नेपालका लागि अश्मिना कर्माचार्यले उत्कृष्ट बलिङ गर्दै ५ विकेट लिएकी थिइन् । तर नेपालले ब्याटिङ गर्न नपाएपछि बाहिरिन पुग्यो ।
नेपालले समूह चरणमा भुटान, बहराइन र कुवेतलाई पराजित गरे पनि हङकङसँग पराजित भएको थियो ।
फाइनल पुग्ने दुई टोली एसिया कपमा छानिने छन् । यूएई छानिइसकेको छ भने हङकङ र मलेसियाबीचको विजेता पनि छानिने छ । यो खेलमा पनि वर्षाले असर गरेको छ । खेल पूरा हुन नपाए समूह विजेता भएका नाताले हङकङ फाइनलमा पुग्नेछ ।
एसिया कपमा जारी च्याम्पियनशिपबाट छानिएका दुई टिमले भारत, पाकिस्तान, बंगलादेश, श्रीलंका र थाइल्यान्डसँग प्रतिस्पर्धा गर्नेछन् ।
