सुदूरपश्चिम । सुदूरपश्चिम प्रदेशमा पछिल्लो दुई दिनमा थप ६८ व्यक्ति कोरोना भाइरसबाट संक्रमित भएका छन् । स्वास्थ्य निर्देशनालय दीपायलका अनुसार आइतबार र सोमबार गरिएको ८७१ को नमूना परीक्षण गर्दा ६८ जना संक्रमित भेटिएका हुन् ।
संक्रमण रोकथाममा भइरहेको कमीकमजोरीले यो रोगको संक्रमण दर पछिल्ला दिनमा उकालो लागेको स्वास्थ्यकर्मीले बताएका छन् । संक्रमित स्वयंले पनि चासो नदिँदा पनि यो रोगको संक्रमण दर बढेको हो ।
सामाजिक विकास मन्त्रालयका सचिव दीपक लामिछानेले संक्रमण रोकथामका लागि सीमा नाकाबाट भित्रिने नागरिकको कडाइका साथ स्वास्थ्य परीक्षण गर्ने व्यवस्था गरिएको बताए । जटिल अवस्थाको संक्रमितलाई अस्पतालसम्म पुर्याउन गौरीफन्टा नाका र गड्डाचौकी नाकामा एम्बुलेन्सलाई तयारी अवस्थामा राखिएको उनले जानकारी दिए ।
'नमूना परीक्षणबाट लक्षण देखिनेलाई परामर्श दिएर होम आइसोलेसनमा बस्नुपर्ने सल्लाह दिने गरिएको छ', उनले भने, 'जटिल अवस्था भएको संक्रमितलाई सोझै अस्पतालमा भर्ना गर्ने व्यवस्था गरिएको छ ।'
रोकथामका लागि नियमितरूपमा जनचेतनासम्बन्धी सन्देशमूलक कार्यक्रम सञ्चालन गरिएको लामिछानेले बताए । रोकथामका लागि मान्छेको बढी भीड हुने सार्वजनिकस्थलमा ‘खोज र खोपको अभियान’ थालिएको छ ।
मास्क लगाएर संक्रमण हुनबाट सुरक्षित हुन सकिने भए पनि अधिकांश नागरिकले मास्क र स्यानिटाइजरको प्रयोग गरेको देखिँदैन । संक्रमितलाई राख्न धनगढीको कनरीमा विगतमा सञ्चालनमा आएको आइसोलेसन सेन्टर बन्द रहेको छ । कोरोनाको रोकथामलाई लक्षित गरेर धनगढी-३ मा निर्माण पूरा भएको होल्डिङ सेन्टर पनि प्रयोगमा ल्याइएको छैन । नेपाली सेनाले निर्माण गरेको होल्डिङ सेन्टर पालिकालाई हस्तान्तरण भएको छैन ।
पछिल्ला दिनमा प्रदेशमा कोरोनाका सक्रिय बिरामी पनि बढेका छन् । आज थपिएका बिरामीसमेत कोरोना भाइरस फैलिएयता प्रदेशमा हालसम्म जम्मा ५९ हजार नौ सय ६७ संक्रमित पुगेका छन् ।
गत फागुनयता यो रोगले हुने मृत्यु दर भने प्रदेशमा शून्य छ । फागुनदेखि संक्रमण हुने दर पनि घट्दै गएकामा पछिल्ला हप्तामा पुनः बढ्न थालेको हो । छिमेकी देश भारतमा यो रोगको संक्रमण बढेसँगै नेपालमा पनि यो रोगको संक्रमण बढ्न थालेको जनाइएको छ ।
