काठमाडौँ । नेकपा माले प्रगतिशील जनवादी पार्टी एमालेमा विलय भएको छ ।
सो पार्टीका महासचिव मधु चालिसेसहित करिब १५० जनालाई लिएर एमाले छिरे । केन्द्रीय कार्यालय धूम्रबाराहीमा आयोजित कार्यक्रममा पार्टीका अध्यक्ष केपी शर्मा ओली, महासचिव ईश्वर पोखरेललगायत नेताले उनीहरुलाई स्वागत गरे ।
यसअघि मालेको केन्द्रीय सदस्य रहेका ललितपुर निवासी चालिसेले एक वर्षअघि पार्टीबाट निष्क्रिय भई नयाँ समूह बनाएका थिए ।
नवप्रवेशीलाई स्वागत गर्दै अध्यक्ष ओलीले पार्टीमा आउने सबै नयाँ नेता कार्यकर्तालाई योग्यता र क्षमताबमोजिम उचित जिम्मेवारी दिइने बताए ।
पूर्वप्रधानमन्त्री समेत रहेका ओलीले पार्टीले सञ्चालन गर्ने संविधान कार्यान्वयनसम्बन्धी अभियानमा सक्रिय रुपमा सहभागी हुन कार्यकर्तालाई आग्रह गरे ।