काठमाडौँ । टी–२० विश्वकप छनोटको एसिया क्षेत्रको छनोट चरणको प्रतियोगिता नेपालमा हुने भएको छ । अमेरिका र वेस्ट इन्डिजले सन् २०२४ को जुनमा आयोजना गर्ने टी–२० विश्वकपका लागि नेपालले एसिया क्षेत्रको छनोट चरणको प्रतियोगिता आयोजना गर्ने भएको हो ।
अन्तर्राष्ट्रिय क्रिकेट परिषद आईसीसीले नोभेम्बर १ देखि १० तारिखसम्म एसिया क्षेत्रको टी–२० विश्वकप छनोट प्रतियोगिता आयोजना गर्न आईसीसीले नेपाललाई आयोजनाको जिम्मेवारी दिएको हो ।
नेपाल क्रिकेट संघ (क्यान) का अध्यक्ष चतुरबहादुर चन्दका अनुसार ‘आईसीसीले र्इमेल पठाएर नेपाललाई प्रतियोगिता आयोजना गर्न दिन लागेको निश्चित गरेको हो ।
६ महिनाअघि आईसीसीले नेपाललाई बंगलादेशसँग मिलेर सन् २०२७ मा आईसीसी यू–१९ महिला विश्वकप आयोजना गर्ने जिम्मेवारी तोकिसकेको छ । नेपालले पहिलो पटक आईसीसीको यति ठूलो प्रतियोगिता आयोजना गर्ने अवसर पाएको हो ।
टी–२० विश्वकप छनोटको एसियाको छनोटमा नेपालसहित, यूएई, ओमान, हङकङ, बहराइन र सिंगापुरले प्रतिस्पर्धा गर्दै छन् ।
