काठमाडौं । नेपालीलाई नक्कली भुटानी शरणार्थी बनाएर अमेरिका पठाउने प्रकरणमा परेका नेपाली कांग्रेसका पूर्व सांसद आङटावा शेर्पा हिरासतमा रहेका छन् । जिल्ला अदालत काठमाडौंले नेपालीलाई शरणार्थी बनाएर सङ्गठित ठगी गरेको प्रकरणमा मुछिएपछि शेर्पालाई दुई दिन हिरासतमा राखेर अनुसन्धान गर्न प्रहरीलाई अनुमति दिएको छ ।
जिल्ला अदालतले मंगलबार दुई दिनको म्याद दिएको जिल्ला प्रहरी परिसर काठमाडौंका प्रहरी उपरीक्षक सीताराम रिजालले जानकारी दिए ।
शेर्पाले सोमबार साँझ जिल्ला प्रहरी परिसर काठमाडौंमा पुगेर आत्मसमर्पण गरेका थिए । सो प्रकरणमा घटनामा नाम जोडिएपछि बुझ्नका लागि भन्दै सोमबार शेर्पा आफैँ जिल्ला प्रहरी परिसर काठमाडौंमा पुगेका थिए । यसअघि प्रहरीले शेर्पाको बारेमा अनुसन्धान गरिरहेको बेला आफैँ प्रहरीमा आएपछि उनलाई प्रहरीले नियन्त्रणमा लिएको थियो ।
उनी शरणार्थी प्रकरणमा पक्राउ परेका सानु भण्डारीलाई हिरासतमै गएर भेटेको सार्वजनिक भएको थियो । उनसहित अहिलेसम्म पूर्वउपप्रधानमन्त्री टोपबहादुर रायमाझी र पूर्वमन्त्री बालकृष्ण खाँडसहित १४ जनालाई नियन्त्रणमा लिएर प्रहरीले अनुसन्धान गरिरहेको छ भने दुई जना अझै फरार छन् । एमाले उपाध्यक्ष एवं पूर्व गृहमन्त्री रामबहादुर थापा बादलका छोरा र इन्द्रजित राईका छोरा पक्राउ पर्न बाँकी छ ।
