काठमाडौं। विश्व हिन्दू महासंघ अन्तराष्ट्रिय समितिको अगुवाईमा आउँदो कात्तिक ४ गते विश्व हिन्दू विराट महासम्मेलन सुरू हुँदैछ । काठमाडौंको बनकालीमा ४ गतेबाट सुरू हुने महासम्मेलनलाई पूर्व राजा ज्ञानेन्द्रले उद्घाटन गर्ने कार्यतालिका रहेको आयोजक समितिले जानकारी दिएको छ । उक्त महासम्मेलन ३ दिन चल्ने छ।
यो सम्मेलन यस अघि पनि दुई पटक भईसकेको थियो । जसमा तात्कालीन राजाको हैसियतमा वीरेन्द्र शाहले महासम्मेलनको उद्घाटन गरेका थिए । पहिलो सम्मेलन बीरगञ्जमा र दोस्रो सम्मेलन काठमाडौंकै दशरथ रंगशालामा भईसकेको महासंघको राजाकै हैसियतमा मानेर पूर्व राजा ज्ञानेन्द्रलाई उद्घाटन गराउन लागेको संयोजक भरत केसर सिंहले जानकारी दिए ।
सम्मेलनमा ४४ राष्ट्रका प्रतिनिधिहरूलाई आमन्त्रण गरिएको छ भने भारतबाट शंकराचार्य आश्रमका विभिन्न पीठाधीसहरूसँगै भारतीय जनता पार्टीका सांसद् एवं उत्तरप्रदेश सरकारका मुख्यमन्त्रीका दावेदार समेत रहेका आदित्यनाथ योगी समेत आउने तयारी भईरहेको आयोजक समितिले जानकारी दियो।
