सरकारमा गएको दुई दिनमै नेकपा एसको घुर्की, भने जति मन्त्रालय नपाए समर्थन फिर्ता
विवेक मिश्र,
प्रकाशित २०८० असार २४ आइतबार
888
Shares
तस्बिर – फाइल ।
मोरङ । कोशी प्रदेशका मुख्यमन्त्री उद्धव थापाले मन्त्रिमण्डल विस्तार गरेका छन् । आइतबार उनले नेकपा माओवादी केन्द्रका दुई तथा नेपाली कांग्रेसका एक सांसदलाई मन्त्री बनाएका हुन् ।
माओवादीबाट जीवन आचार्य र राजेन्द्र कार्कीलाई मन्त्री नियुक्त गरेका छन् । त्यस्तै कांग्रेसका रामकुमार खत्री पनि मन्त्री बनेका छन् । उनीहरुले पद तथा गोपनियताको शपथ लिइसकेका छन् ।
आचार्य माओवादी अध्यक्षसमेत रहेका प्रधानमन्त्री पुष्पकमल दाहाल प्रचण्डका ज्वाइँ हुन् । उनलाई कोशी प्रदेशको आर्थिक मामिला तथा योजना मन्त्रीमा नियुक्त गरिएको छ । आचार्य हिक्मत कार्की नेतृत्वको सरकारमा पर्यटन, वन तथा वातावरण मन्त्री थिए । उनले जेठ २३ मा राजीनामा दिएका थिए । एक महिनामै आचार्य पुनः मन्त्री बनेका हुन् । जीवनबाहेक अन्य मन्त्रीहरूको भने जिम्मेवारी तोकिएको छैन ।
बिहीबार मुख्यमन्त्री भएर शुक्रबार पद तथा गोपनियताको शपथ लिँदै जिम्मेवारी सम्हालेका थापाले शुक्रबारै कांग्रेसका प्रदीप सुनुवार र नेकपा एकीकृत समाजवादीका कमल जवेगुलाई मन्त्री नियुक्त गरेका थिए ।
एकीकृत समाजवादी भने मन्त्रिमण्डल विस्तारमा असन्तुष्ट बनेको छ । आज नयाँ नियुक्त भएका तीन मन्त्रीमा आफ्नो पार्टीका कोही नपरेपछि एकीकृत समाजवादीले असन्तुष्टि जनाएको हो ।
यसअघि एक जना मन्त्री थप्ने सहमति भए पनि तीन मन्त्री थप हुँदा आफ्नो पार्टीबाट नपरेको एकीकृत समाजवादी संसदीय दलका नेता राजेन्द्र राईले बताए ।
एकीकृत समाजवादीबाट एक जना भने मन्त्री नियुक्त भइसकेका छन् ।
त्यही असन्तुष्टिबीच आजको शपथको कार्यक्रममा मन्त्री जवेगु सहभागी भएनन् ।
उनी मन्त्री बनेको दुई दिनमात्रै भएको छ । यसरी दुई दिनमै असन्तुष्टि जनाउँदा भने समस्या उब्जिएको छ ।
तर समाजवादी संसदीय दलका नेता राईले भने यो समस्याको समाधान हुने आशा व्यक्त गरेका छन् । तर भनेअनुसार नभए समर्थन फिर्ता लिने सन्देश दिइएको छ ।
