कोशीमा सात दिनभित्र मुख्यमन्त्री नियुक्त गर्न आदेश, त्यतिन्जेल थापा हैन कार्की नै मुख्यमन्त्री

हाम्रा कुरा

प्रकाशित २०८० साउन ११ बिहिबार

काठमाडौँ । कोशी प्रदेशमा गठबन्धन सरकारलाई झड्का लागेको छ । सर्वोच्च अदालतले गठबन्धनका तर्फबाट मुख्यमन्त्री बनेका उद्धव थापाको नियुक्ति कानून सम्मत नभएको भन्दै उनको नियुक्ति बदर गरिदिएसँगै गठबन्धन सरकारलाई झड्का लागेको हो ।

त्यहाँ सभामुखकोसमेत मतले गठबन्धनका तर्फबाट थापालाई प्रदेश प्रमु्खले मुख्यमन्त्री बनाएका थिए । तर उक्त प्रक्रिया कानून सम्मत नभएको भन्दै सर्वोच्चले नियुक्ति प्रक्रिया बदर गरेको हो ।

अब सर्वोच्चले सात दिनभित्र नयाँ सरकार गठनको प्रक्रिया बढाउन आदेश दिएको छ ।

नेपालको संविधानको धारा १६८ को उपधारा ९(२) बमोजिम अर्को सरकार गठन गर्ने विकल्प रहेसम्म सो विकल्प अपनाउनु वाञ्छनीय देखिएको आदेशमा भनिएको छ ।

आदेशमा भनिएको छ, ‘उक्त धारा १६८ को उपधारा (२) बमोजिम सरकार गठन गर्न मिल्ने नै अवस्था रहेको र जुन विन्दूबाट संविधानको प्रयोग र पालनामा त्रुटि भएको हो, सोही अवस्थाबाट संविधानसम्मत् तबरले प्रकृया अगाडि बढाउनु मनासिव हुने देखिएको हुँदा आजका मितिले सात दिनभित्र (२०८०–४–१७ गतेभित्र) नेपालको संविधानको धारा १६८ को उपधारा (२) बमोजिम प्रदेश सभाको बहुमत प्राप्त गर्न सक्ने प्रदेश सभाको सदस्यलाई मुख्यमन्त्री पदमा नियुक्त गर्नु भनी प्रत्यर्थी कोसी प्रदेशका प्रदेश प्रमुख समेतको नाममा परमादेश जारी हुने ठहर्छ ।’

थापाको नियुक्ति बदर गर्दै पूर्वमुख्यमन्त्री हिक्मतकुमार कार्कीलाई नै मुख्यमन्त्रीको जिम्मेवारी दिनसमेत प्रदेश प्रमुखका नाममा आदेश दिएको छ ।

गत असार २२ गते एमाले संसदीय दलका नेता कार्कीले दायर गरेको रिटमा आदेश गर्दै कार्कीलाई नै मुख्यमन्त्री नियुक्त गर्न सर्वोच्च अदातलले आदेश जारी गरेको हो ।

योसँगै गठबन्धन सरकार तीन सातामै ढलेको छ ।