सङ्कटमा ओलीले साथ दिए, भेट्न गएँ : सांसद शर्मा [भिडियो]
हाम्रा कुरा
प्रकाशित २०८० साउन ३१ बुधबार
742
Shares
मोरङ । नेपाली कांग्रेसका सांसद डा.सुनील शर्माले सङ्कटमा साथ दिएकाले एमाले अध्यक्ष केपी शर्मा ओलीलाई भेट्न गएको बताएका छन् ।
नेपाली कांग्रेसले मंगलबार मोरङको पथरीशनिश्चरेमा आयोजना गरेको कार्यक्रमलाई सम्बोधन गर्दै सांसद शर्माले ओलीलाई भेट्न उनको निवास बालकोट जानुको कारण कार्यकर्तासमक्ष खुलाएका हुन् ।
सुन तस्करी गरेर राज्यलाई करोडौँ, अर्बौँ राजश्व छली भइरहेकाले त्यसको विरुद्धमा बोल्दा आफूलाई षड्यन्त्रपूर्वक हिरासतमा पुर्याइएको उनले बताए ।
आफूमाथि अन्याय हुँदा आफ्नै पार्टीका कतिपय जिम्मेवार व्यक्ति मौन बसेको भन्दै उनले दुःख व्यक्त गरे । तर प्रतिपक्षी दल एमालेका अध्यक्ष केपी शर्मा ओलीले पक्राउको विरोधमा बोलेर आफूलाई सङ्कटका बेला साथ दिएकाले ओलीलाई भेट्न गएको उनले सुनाए ।
‘अनुमान लगाउनुस्, तपाईँलाई तपाइकै बुबाले मार्न भनेर घाँटीमा न्याकेर पोखरीमा डुबाए, तर त्यति बेला सधैँ झगडा गरिरहने छिमेकी आएर तपाईँलाई बचायो भने पोखरीबाट निस्किएपछि मार्न खोज्ने बुबालाई अङ्गालो मार्नुहुन्छ कि उद्धार गर्नेलाई मार्नुहुन्छ ?'
उनले थपे, ‘सङ्कटमा जसले बचायो त्यसलाई पहिले अङ्गालो मारिन्छ, हो मैले पनि त्यही कारण केपी ओली जिन्दाबाद भनेको हुँ, उनलाई भेट्न पनि गएको हुँ ।’
आफूलाई गिरफ्तार गराउन कांग्रेस भित्रकै कतिपय जिम्मेवार व्यक्ति लागिपरेको उनले आशङ्का व्यक्त गरे । बालकृष्ण खाँडलाई पक्राउ गराउने समूहले नै आफूलाई पनि फसाउने योजना रचेर पक्राउ गराएको उनले सुनाए ।
