-
-
-
-
बाँके । बाँकेको खजुरा गाउँपालिकामा श्रीमान् र श्रीमतीबीच भएको आपसी झगडामा हतियार हानाहान हुँदा दुवै जना गम्भीर घाइते भएका छन् । आपसमा हानाहान हुँदा गम्भीर घाइते भएका दुवै जनाको उपचार भइरहेको छ ।
खजुरा गाउँपालिका वडा नम्बर ३ बीगाउँका महेन्द्र रावल र श्रीमती रितासिंह ठकुरीका बीचमा घरकै कोठामा भएको हानाहानमा मासु काट्ने धारिलो हतियार ‘दाउ’ पनि प्रयोग भएको जिल्ला प्रहरी कार्यालय बाँकेले जनाएको छ । धारिलो हतियारले श्रीमतीको घाँटीमा काटेको छ ।
बाँके प्रहरी प्रवक्ता प्रहरी नायब उपरीक्षक नारायण डाँगीले श्रीमान् र श्रीमती कोठामा झगडा गरेको सूचना पाएपछि प्रहरी पुगेर ढोका फोरेर हेर्दा दुवै जना बेहोश अवस्थामा रहेकाले उपचारका लागि नेपालगञ्ज ल्याइएको जानकारी दिए ।
दुवै जनाको नेपालगञ्ज मेडिकल कलेजमा उपचार भइरहेको छ । प्रहरीका अनुसार दुवैको अवस्था गम्भीर रहेको छ ।
