काठमाडौँ । टी–२० विश्वकप क्रिकेट विजेता भारतले विश्वकप पछिको पहिलो खेलमा लज्जास्पद प्रदर्शन गरेको छ ।
भारत विश्वकपमा छनोट हुन नसकेको टिम जिम्बाब्वेसँग पराजित भएको हो । भारतले जिम्बाब्वेको हरारेमा भएको खेलमा १३ रनको हार बेहोर्यो ।
शनिबार भएको खेलमा पहिले ब्याटिङ गरेको जिम्बाब्वेले ९ विकेटको क्षतिमा ११५ रन बनायो । क्लिभे मडान्डेले २५ बलमा सर्वाधिक २९ रन बनाएको इनिङ्सलाई सस्तैमा समेट्ने क्रममा रवि बिस्नोईले १३ रन खर्चेर ४ तथा वासिंगटन सुन्दरले २ विकेट लिए ।
जवाफमा भारत १९.५ ओभरमा १०२ रन बनाएर अलआउट भयो । कप्तान शुबमन गिलले २९ बलमा ३१ रन बनाए ।
अलराउन्ड प्रदर्शन गर्ने क्रममा सुन्दरले ३४ बलमा २७ रन बनाए पनि टिमलाई जिताउन सकेनन् । कप्तान सिकन्दर रजा र टेन्डाइ चतराले समान ३–३ विकेट लिए ।
कमजोर खेलेको भारतले २२ रन जोड्दा ४ विकेट गुमाइसकेको थियो । विश्वकप जितेको भारतीय टिमले शुक्रबार भारतमा भब्य स्वागत पाइरहँदा शुबमन गिलको कप्तानीमा टिम जिम्बाब्वे गएको हो ।
पाँच खेलको श्रृंखलामा भारत १–० ले पछि परेको छ । दोस्रो खेल आइतबार हुनेछ ।