श्रीलंकाविरुद्ध नेपाली टिमको रोमाञ्चक दुई रनको जित, शुक्रबारदेखि एसिया कप
हाम्रा कुरा
प्रकाशित २०८१ साउन १ मंगलबार
376
Shares
काठमाडौँ । श्रीलंकामा रहेको नेपाली महिला क्रिकेट टिमले श्रीलंका डेभलपमेन्ट टिमलाई २ रनले पराजित गरेको छ । टी–२० श्रृंखलाको अन्तिम खेलमा नेपालले श्रीलंकाको टिमलाई २ रनले पराजित गरेको हो ।
नेपालले दिएको ११३ रनको लक्ष्य पछ्याएको श्रीलंकाले २० ओभरमा ५ विकेट गुमाउँदै ११० रनमात्र बनाएपछि नेपाल २ रनले विजयी भएको हो ।
अन्तिम खेलमा नेपाल विजयी भए पनि श्रृंखला भने श्रीलंकाको डेभलपमेन्ट टिमले २–१ ले जितेको छ ।
नेपाली महिला टिमले शुक्रबारदेखि श्रीलंकाको डाम्बुलामा हुने महिला एसिया कप खेल्ने छ ।
भारत, पाकिस्तान, श्रीलंका र बंगलादेशसहित एसीसीले महिला प्रिमियर कप २०२४ को सेमिफाइनल पुग्ने यूएई, मलेसिया, नेपाल र थाइल्याण्डलाई एसिया कप खेल्न दिने निर्णय गरेको थियो ।
एसिया कपमा नेपाल समूह ए मा रहेको छ । नेपाल भारत, पाकिस्तान र यूएईसँगै समूह ए मा रहेको छ भने समूह बी मा बंगलादेश, श्रीलंका, मलेसिया र थाइल्याण्ड रहेका छन् ।
नेपालले आफ्नो पहिलो खेल एसिया कपको उद्घाटनकै दिन जुलाई १९ मा युएईविरुद्ध खेल्ने छ भने दोस्रो खेल जुलाई २१ मा पाकिस्तानविरुद्ध र तेस्रो खेल जुलाई २३ मा भारतविरुद्ध खेल्ने तालिका एसीसीले सार्बजनिक गरेको छ ।
