काठमाडौँ । आजदेखि महिला एसिया कप क्रिकेट शुरु भएको छ । श्रीलंकाको डाम्बुलामा एसियाका ८ देश सहभागी प्रतियोगिताको उद्घाटन खेलमा अहिले नेपालले यूएईसँग खेलिरहेको छ ।
नेपालले टस जितेर पहिले बलिङ रोजेको छ । कप्तान इन्दू बर्माले मौसमका कारण बलिङ रोज्नु परेको बताइन् । हावा बढी चलेको भन्दै उनले बलिङ रोजेकी हुन् । यता यूएई कप्तानले भने आफूले टस जितेको भए पनि ब्याटिङ नै रोज्ने भन्दै खुशी व्यक्त गरिन् ।
नेपालसँगै भारत, पाकिस्तान, श्रीलंका, बंगलादेश, यूएई, मलेसिया र थाइल्याण्डसहित आठ राष्ट्र रहेका हुन् । एसीसीले महिला प्रिमियर कप २०२४ को सेमिफाइनलमा पुग्ने नेपालसहित यूएई, मलेसिया र थाइल्याण्डले एसिया कप खेल्न लागेका हुन् ।
एसिया कपमा नेपाल समूह ए मा रहेको छ । नेपाल भारत, पाकिस्तान र यूएईसँगै समुह ए मा रहेको हो भने समूह बी मा बंगलादेश, श्रीलंका, मलेसिया र थाइल्याण्ड रहेका छन् ।
आज अर्को खेल भारत र पाकिस्तानबीच बेलुकी ७ः१५ बजेदेखि शुरु हुँदैछ ।
नेपालले दोस्रो खेल आइतबार पाकिस्तानविरुद्ध र तेस्रो खेल मंगलबार भारतविरुद्ध खेल्ने तालिका रहेको छ ।
पुरुष टीमले उत्कृष्ट प्रदर्शन गरिरहँदा महिला टिमलाई पनि क्षमता प्रदर्शन गर्ने राम्रो अवसर रहेको छ ।