काठमाडौँ । श्रीलंकाको दाम्बुलामा जारी एसिया कप महिला क्रिकेटमा भारत लगातार दोस्रो जितसहित सेमिफाइनल नजिक पुगेको छ ।
भारतले पहिलो खेलमा पाकिस्तानलाई र दोस्रो खेलमा आइतबार यूएईलाई ७८ रनले पराजित गर्दै सेमिफाइनल नजिक पुगेको हो ।
पहिले ब्याटिङ गरेको भारतले ५ विकेटको क्षतिमा २०१ रन बनायो । कप्तान हर्मनप्रित कौरले ४७ बलमा ६६ तथा रिचा घोषले २९ बलमा अविजित रहँदै ६४ रन बनाइन् । काभिशा एगोडेजले २ विकेट लिइन् ।
जवाफमा यूएईले निर्धारित २० ओभरमा ७ विकेटको क्षतिमा १२३ रन बनायो । अलराउन्डर काभिशाले ३२ बलमा अविजित रहँदै ४० रन जोडिन् । दिप्ती शर्माले २ विकेट लिइन् ।
लगातार दुई हारसहित यूएई सेमिफाइनलको होडबाट बाहिरिएको छ ।
आजको दोस्रो खेलमा नेपालले पाकिस्तानसँग खेल्दैछ । खेल बेलुकी ७ः१५ बजेदेखि शुरु हुनेछ ।
नेपालले पहिलो खेलमा यूएईलाई ६ विकेटले हराएर शानदार शुरुआत गरेको छ । आज पाकिस्तानलाई हराएमा नेपाल एक खेलअघि नै सेमिफाइनलमा पुग्नेछ ।
नेपाल विजयी भए भारत पनि एक खेलअघि नै सेमिफाइनलमा पुग्नेछ ।
समूह चरणको अन्तिम खेलमा नेपाल र भारत खेल्दैछन् । त्यस्तै पाकिस्तानले यूएईसँग खेल्नेछ । सेमिफाइनलको सम्भावना जीवितै राख्न पाकिस्तानलाई आज जित्नैपर्ने दबाब छ ।
यसरी हराएको थियो नेपालले यूएईलाई
गत शुक्रबार भएको उद्घाटन खेलमा नेपालले यूएईलाई ६ विकेटले पराजित गर्यो । विजयका लागि नेपालले ११६ रनको चुनौती पाएको नेपालले १६.१ ओभरमै ४ विकेटको क्षतिमा पूरा गर्यो ।
नेपालका लागि ओपनर सम्झना खड्काले ४५ बलमा ११ चौकाको मद्धतले अविजित रहँदै ७२ रन बनाइन् ।
त्यस्तै रुबिना क्षेत्रीले ८ बलमा १० रन जोडिन् । त्यसबाहेक कसैले दोहोरो स्कोर बनाएनन् । अलराउन्डर काभिशा एगोडागेले ३ विकेट लिइन् ।
यसअघि खेलमा टस जितेर पहिले बलिङ गरेको नेपालले यूएईलाई ११५ रनमा रोक्यो ।
यूएईले निर्धारित २० ओभरको खेलमा ८ विकेटको क्षतिमा ११५ रन बनायो । खुशी शर्माले ३९ बलमा ३६ तथा कभिशा एगोडागेले २६ बलमा २२ रन बनाइन् ।
नेपालका लागि कप्तान इन्दू बर्माले १९ रन खर्चेर ३ विकेट लिइन् । सबनम राई, कविता जोशी र कृतिका मरासिनीले १–१ विकेट लिए ।
पूर्वकप्तान रुबिना क्षेत्री, सीता राना मगर र कविता कुँवर भने विकेट विहीन भए ।
दुई खेलाडी रनआउट भएका थिए ।
आठ टिम सहभागी प्रतियोगिताको समूह ए मा नेपाल र यूएईसँगै भारत र पाकिस्तान रहेका छन् ।
अर्को समूहमा श्रीलंका, बंगलादेश, माल्दिभ्स र थाइल्याण्ड रहेका छन् । शीर्ष दुई टिम सेमिफाइनलमा पुग्नेछन् ।