काठमाडौँ । श्रीलंकाको दाम्बुलामा जारी एसिया कप महिला क्रिकेटको समूह चरणको अन्तिम खेलमा नेपालले भारतसँग खेल्दैछ । यो खेल नेपाली समयअनुसार बेलुकी ७ः१५ बजे शुरु हुनेछ ।
यो खेल जितेका खण्डमा मात्रै नेपालले सेमिफाइनलको यात्रा तय गर्न सक्छ । नेपालले दोस्रो खेलमा पाकिस्तानसँग कमजोर प्रदर्शन गरेसँगै सेमिफाइनल सम्भावना कमजोर बनेको हो ।
नेपाल पाकिस्तानसँग ९ विकेटको फराकिलो अन्तरले पराजित भएको हो । जितका लागि १०९ रनको सामान्य चुनौती पछ्याएको पाकिस्तानले ११.५ ओभरमै १ विकेटको क्षतिमा जित हासिल गर्यो ।
पहिलो विकेटका लागि १०५ रनको साझेदारी गर्ने क्रममा गुल फेरोजाले ३५ बलमा ५७ तथा मुनिबा अलीले ३४ बलमा अविजित रहँदै ४६ रन जोडिन् ।
नेपालका लागि कविता जोशीले विकेट लिइन् । त्यसबाहेक सबै खेलाडी महँगा सावित भए ।
यसअघि टस हारेर नेपालले पहिले ब्याटिङ गर्दै ६ विकेटको क्षतिमा १०८ रन बनायो । नेपालका लागि कविता जोशीले २३ बलमा अविजित रहँदै ३१ रन बनाइन् । सीता राना मगरले ३० बलमा २६ तथा पूजा महतोले ३२ बलमा २५ रन बनाइन् । दुवै राम्रो खेलिरहेका बेलामा रनआउट भए । तीन नेपाली खेलाडी रन आउट भए ।
यसअघि नेपालले पहिलो खेलमा यूएईमाथि ६ विकेटको जित हासिल गरेको थियो । तर पाकिस्तानसँगको हारसँगै नेपालको सेमिफाइनल सम्भावना कमजोर बनेको छ ।
कसरी पुग्नसक्छ नेपाल सेमिफाइनलमा ?
नेपाल सेमिफाइनलमा पुग्नका लागि नेपालले भारतलाई हराएरमात्र पुग्नेछैन यसअघिको पाकिस्तान र यूएईबीचको खेलमा यूएई विजयी हुनुपर्नेछ ।
यूएई सबैभन्दा कमजोर टिम हो । यो अवस्थामा यूएईले पाकिस्तानलाई हराउने सम्भावना कम छ ।
यद्यपि यूएईले पाकिस्तानलाई फराकिलो अन्तरले पराजित गरेका खण्डमा मात्रै नेपालको सम्भावना हुन सक्छ ।
त्यसका लागि नेपालले भारतलाई हराउनै पर्छ । भारतलाई हराउन नसकेका खण्डमा पाकिस्तानलाई यूएईले हराए पनि रन रेटमा पाकिस्तान अगाडि हुन सक्छ ।
रन रेटमा हेर्ने हो भने भारत २ खेलमा ४ अंकसहित समूह ए को शीर्ष स्थानमा छ । उसको ३.३८६ रेट रन रेट रहेको छ ।
भारत नेपालसँग पराजित भए पनि उसको सेमिफाइनल सम्भावना निश्चित छ । किनकि नेपालले भारतलाई हराए पनि भारतको रनरेटलाई भेटाउन सक्दैन ।
अर्कातर्फ पाकिस्तानको २ खेलमा २ अंक छ । उसको नेट रन रेट ०.४०९ रहेको छ । नेपालको २ खेलमा २ अंक छ र नेट रन रेट माइनस ०.८१९ छ ।
त्यस्तै पुछारको यूएईको २ खेलमा कुनै अंक छैन र नेट रन रेट माइनस २.८७० छ ।
यसरी कायापलटको परिणाम ल्याउँदै नेपालले भारतलाई र यूएईले पाकिस्तानलाई हराएमात्र नेपाल सेमिफाइनलमा पुग्न सक्छ ।
अन्यथा नेपालको सम्भावना निकै कम छ । पाकिस्तान र यूएई दिउँसो २ः१५ बजे खेल्नेछन् ।
समूह बीबाट ४ अंकसहित श्रीलंका सेमिफाइनलमा पुगिसकेको छ भने २–२ अंकका थाइल्याण्ड र बंगलादेशमध्ये एक टिम सेमिफाइनलमा पुग्नेछ ।
यसरी हराएको थियो नेपालले यूएईलाई
गत शुक्रबार भएको उद्घाटन खेलमा नेपालले यूएईलाई ६ विकेटले पराजित गर्यो । विजयका लागि नेपालले ११६ रनको चुनौती पाएको नेपालले १६.१ ओभरमै ४ विकेटको क्षतिमा पूरा गर्यो ।
नेपालका लागि ओपनर सम्झना खड्काले ४५ बलमा ११ चौकाको मद्धतले अविजित रहँदै ७२ रन बनाइन् ।
त्यस्तै रुबिना क्षेत्रीले ८ बलमा १० रन जोडिन् । त्यसबाहेक कसैले दोहोरो स्कोर बनाएनन् । अलराउन्डर काभिशा एगोडागेले ३ विकेट लिइन् ।
यसअघि खेलमा टस जितेर पहिले बलिङ गरेको नेपालले यूएईलाई ११५ रनमा रोक्यो ।
यूएईले निर्धारित २० ओभरको खेलमा ८ विकेटको क्षतिमा ११५ रन बनायो । खुशी शर्माले ३९ बलमा ३६ तथा कभिशा एगोडागेले २६ बलमा २२ रन बनाइन् ।
नेपालका लागि कप्तान इन्दू बर्माले १९ रन खर्चेर ३ विकेट लिइन् । सबनम राई, कविता जोशी र कृतिका मरासिनीले १–१ विकेट लिए ।
पूर्वकप्तान रुबिना क्षेत्री, सीता राना मगर र कविता कुँवर भने विकेट विहीन भए ।
दुई खेलाडी रनआउट भएका थिए ।