तोडियो नेपालको हारको श्रृंखला, ओमानमाथि ३७ रनले विजयी
हाम्रा कुरा
प्रकाशित २०८१ असोज १४ सोमबार
163
Shares
काठमाडौँ । क्यानाडा भ्रमणमा रहेको नेपालको हारको श्रृंखला तोडिएको छ । नेपालले ओमानमाथि जित हासिल गरेको छ । गएराति सम्पन्न त्रिकोणात्मक टी–२० श्रृंखला अन्तर्गतको खेलमा नेपालले ओमानलाई ३७ रनले पराजित गरेको हो ।
नेपालले दिएको १७७ रनको लक्ष्य ओमान १९.१ ओभरमा अल आउट हुँदै १३९ रन मात्र बनाएपछि नेपाल ३७ रनले विजयी भएको हो ।
ओमानका लागि शोएब खानले सर्वाधिक ४५ रन बनाए भने राफिउल्लले ३३ रन बनाएका थिए । त्यसैगरी नेपाली बलर करण केसीले ३ विकेट लिएका थिए भने कुशल भुर्तेल र गुल्सन झाले २–२ विकेट लिएका थिए ।
यसअघि टस हारेर पहिला ब्याटिंग गरेको नेपालले २० ओभरमा ६ विकेट गुमाउँदै १७६ रन बनाएको थियो । नेपालका लागि गुल्सन झाले सर्वाधिक ४० रन बनाए भने कुशल मल्लले ३०, अनिल शाह र आसिफ सेखले २७–२७, कुशल भुर्तेलले २० तथा दिपेन्द्र सिंह ऐरीले ५ बलमा १८ रन बनाएका थिए ।
यो नेपालको श्रृंखलामा दोस्रो खेलमा पहिलो जित हो । यसअघि पहिलो खेलमा नेपाल क्यानाडासँग १४ रनले पराजित भएको थियो ।
यसअघि विश्वकप लिग २ मा नेपालले क्यानाडासँग दुवै खेल हारेको थियो भने ओमानले एक खेल जितेको थियो भने एक खेल वर्षाले अवरुद्ध भएको थियो ।
अब नेपालले टी–२० श्रृंखलाको तेस्रो खेलमा नेपालले मंगलबार क्यानाडासँग र बुधबार ओमानसँग खेल्ने छ ।
