साफ च्याम्पियनशिपमा नेपालको खस्कियो प्रदर्शन, भुटानसँग पहिलो पटक गोलविहीन [फोटोफिचर]

हाम्रा कुरा

प्रकाशित २०८१ कार्तिक २ शुक्रबार

काठमाडौँ । महिला साफ च्याम्पियनशिपमा नेपालको सबैभन्दा सहज प्रतिस्पर्धी भुटान रहँदै आएकामा यसपालि भने भुटानले कडा जवाफ दिएको छ । यसअघिका चार भिडन्तमा उत्कृष्ट प्रदर्शनसहित २३ गोल गरेको नेपालले एक गोल पनि खाएको थिएन ।

तर काठमाडौँको त्रिपुरेश्वरस्थित दशरंथ रंगशालामा भएको सातौँ संस्करणको पहिलो खेलमै भुटानले नेपाललाई गोलरहित बराबरीमा रोकेर आफू सशक्त भएको दावेदारी दिएको छ । यो नेपालविरुद्ध भुटानको अहिलेसम्मकै सशक्त प्रदर्शन हो ।

यता नेपाल भने उपाधिको दाबेदार भएर पनि कमजोर देखिएको छ । नेपालले एक दर्जन गोल गर्ने अवसर खेर फालेको थियो । एक प्रहार त पोलमै ठोक्किएरसमेत फर्केको थियो ।

उता भुटानले सशक्त डिफेन्स लाइन तयार गरेसँगै नेपालले पाएका अवसरलाई गोलमा परिणत गर्न सकेन ।

यो बराबरीले नेपालको उपाधि दावेदारीमाथि प्रश्न उठ्न थालेको छ । साथै प्रशिक्षकको रणनीतिमाथिसमेत प्रश्न खडा भएको छ ।

अहिलेसम्म ५ पटक फाइनलमा पुगेको नेपालले एक पटक पनि उपाधि जितेको छैन । पाँच पटक भारतले र एक पटक बंगलादेशले उपाधि जितेको छ । नेपालले तेस्रो पटक प्रतियोगिता आयोजना गरिरहेको छ ।

तर यसपालि उपाधिको दावेदारी उत्तिकै रहे पनि पहिलो खेलको प्रदर्शनले नेपाललाई अगाडि बढ्न थप कठिन हुने देखिएको छ ।

नेपाल समूह बीमा रहेको छ । यो समूहमा भुटानसँगै श्रीलंका र माल्दिभ्स छन् । नेपालले सोमबार माल्दिभ्ससँग खेल्नेछ । सेमिफाइनल प्रवेश सम्भावनाका लागि नेपालले माल्दिभ्समाथि जित हासिल गर्नैपर्नेछ ।

माल्दिभ्स भने पहिलो खेलमा शुक्रबार श्रीलंकासँग १–० को हार बेहोरेको छ । सोमबार नै भुटान र श्रीलंका भिड्ने छन् । यदि भुटानले शुक्रबारको जस्तो खेल खेल्यो भने श्रीलंकामाथि हावी हुन बेर लाग्ने छैन ।

समूहमा एक खेलबाट श्रीलंकाको ३ अंक तथा नेपाल र भुटानको समान १–१ अंक छ । माल्दिभ्स अंकविहीन छ ।

अर्को समूहमा भारत, पाकिस्तान र बंगलादेश रहेका छन् । भारतले पहिलो खेलमा बिहीबार पाकिस्तानलाई ५–२ ले हराएको थियो ।