विश्वकपमा छानिएको यू–१९ महिला क्रिकेट टोली फर्कियो, क्यानले जनही साढे दुई लाख पुरस्कार दिने

महिला क्रिकेटको स्वर्णिम समय

विश्वकपमा छानिएको यू–१९ महिला क्रिकेट टोली फर्कियो, क्यानले जनही साढे दुई लाख पुरस्कार दिने

हाम्रा कुरा

प्रकाशित २०८१ कार्तिक २९ बिहिबार

काठमाडौँ । पहिलो पटक विश्वकपमा छानिएर नेपाली यू–१९ महिला क्रिकेट टोली स्वदेश फर्किएको छ । टोली बिहीबार बेलुकी स्वदेश फर्केको हो । पहिलो पटक विश्वकप र एसिया कपमा स्थान सुरक्षित गरेको नेपाली युवा महिला टोलीलाई राष्ट्रिय खेलकुद परिषद् (राखेप) का सदस्य सचिव टङ्कलाल घिसिङ, नेपाल क्रिकेट सङ्घ (क्यान) का सचिव पारस खड्कालगायतका पदाधिकारीहरू र खेल समर्थकहरूले त्रिभुवन अन्तर्राष्ट्रिय विमानस्थलमा भव्य स्वागत गरे ।

राखेपका सदस्य सचिव घिसिङले यु–१९ टोलीले ऐतिहासिक सफलता हासिल गरेकोमा बधाई ज्ञापन गरे । त्यस्तै नेपाली टोलीका प्रशिक्षक महेशप्रसाद रिजालले महिला क्रिकेटमा स्वर्णिम युगको शुरुआत भएको बताए ।

नेपाली टोलीकी कप्तान पूजा महतोले टिमवर्कका कारणले नेपालले विश्वकपसम्मको यात्रा तय गर्न सफल भएको बताइन् । बिहीबारै क्यानले नेपाली खेलाडीलाई जनही रु दुई लाख ५० हजार पुरस्कार दिने घोषणा गरेको थियो ।

संयुक्त अरब इमिरेट्स (यूएई)को अजमानमा बुधबार भएको अन्तिम खेलमा घरेलु टोली यूएईमाथि ८ विकेटको जित निकाल्दै नेपाल पहिलो पटक यू–१९ विश्वकपमा छनोट भएको हो ।

विश्वकपका लागि एसिया छनोटमा नेपालले ६ खेलबाट १० अङ्क जोड्दै रन रेटमा यूएईलाई पछि पार्दै विश्वकपमा स्थान बनाएको हो । यूएई रन रेटले पछि पर्दै विश्वकपमा स्थान बनाउन असफल भयो । चार टोलीमध्ये शीर्ष स्थानमा रहने टोलीलेमात्र विश्वकपमा ठाउँ बनाएको हो ।

यू–१९ विश्वकप क्रिकेट अर्को वर्ष मलेसियामा आयोजना हुँदैछ । विश्वकपका साथै नेपाल पहिलो संस्करणको यू–१९ एसिया कपका लागि पनि छनोट भएको छ । एसियाली क्रिकेट परिषद् एसीसीको आयोजनामा आगामी डिसेम्बरमा हुने यु–१९ महिला एसिया कपका लागि नेपाल छनोट भएको हो ।