काठमाडौँ । पूर्व उपप्रधान तथा गृहमन्त्री एवं राष्ट्रिय स्वतन्त्र पार्टीका सभापति रवि लामिछानेलाई धरौटीमा छाड्न काठमाडौँ जिल्ला अदालतले आदेश दिएको छ ।
स्वर्णलक्ष्मी सहकारीको बचत रकम अपचलनसम्बन्धी मुद्दामा अदालतले लामिछानेलाई ६० लाख धरौटीमा छाड्न आदेश दिएको हो ।
सरकारवादी पक्ष र लामिछाने पक्षका वकिलहरूले बहस सकिएसँगै मुद्दाको आजै आदेश आएको हो । उनी गत आइतबारदेखि काठमाडौँ प्रहरीको हिरासतमा रहेका थिए ।
उक्त सहकारीबाट ६९० बचतकर्ताको १ अर्ब १९ करोड ३० लाख ९० हजार ४९३ रुपैयाँ हिनामिना गरेको आरोप लामिछानेसहित माथि छ ।
रविलाई यसअघि रुपन्देही, चितवन र पर्सा सरकारी वकिलको कार्यालयले बयान लिइसकेको छ । काठमाडौँको मुद्दापछि उनलाई चितवन, रुपन्देही र पर्साले पनि बोलाउने सम्भावना छ ।
यसअघि पोखराको सूर्यदर्शन सहकारीको रकम अपचलन गरेको आरोपमा लामिछानेलाई कास्की जिल्ला अदालतका न्यायाधीश नीतिज राईको इजलासले ६५ लाख रुपैयाँ धरौटीमा छाड्न आदेश दिएको थियो ।
