काठमाडौँ । युगाण्डामा जारी चार देशीय टी–२० क्रिकेट श्रृंखला अन्तर्गत लिग चरणको अन्तिम खेलमा नेपालले हङकङविरुद्ध खेलिरहेको छ ।
जितका लागि नेपालले १०५ रनको चुनौती पछ्याइरहेको छ । खेलमा टस जितेर हङकङले पहिले ब्याटिङ गर्दै ८ विकेटको क्षतिमा १०४ रन बनायो ।
राजमती ऐरीले ३, इन्दू बर्माले २ तथा पूजा महतो र ईश्वरी विष्टले १–१ विकेट लिए ।
यस श्रृंखलामा कमजोर प्रदर्शन गरिरहेको नेपाललाई यो खेल कमजोरी सुधार्ने अवसरको रुपमा रहेको छ ।
किनकि यसअघिका खेलमा कमजोर प्रदर्शन गरेसँगै नेपाल फाइनल पुग्ने होडबाट बाहिरिएको छ ।
नेपालले खेलेका ५ खेलमा १ जित र ४ हार बेहोरेको छ र फाइनलको दौडबाट बाहिरिएको छ । नेपालले यसअघि नामिबियासँग दुवै पटक तथा हङकङ र युगाण्डासँग एक एक खेलमा हार बेहोरेको थियो । त्यस्तै आयोजक युगाण्डालाई एक खेलमा पराजित गरेको थियो ।
मार्च १६ मा अंक तालिकामा पहिलो र दोस्रो हुने तथा तेस्रो र चौथो हुने देशबीच खेल हुने तालिका रहेको छ ।
