काठमाडौँ । नेपाल यू–१९ र अफगानिस्तानको यू–१९ क्रिकेट टोलीबीच तीन खेलको एक दिवसीय शृङ्खलाअन्तर्गत आज दोस्रो खेल भइरहेको छ ।
मूलपानी क्रिकेट मैदानमा टस जितेर पहिले ब्याटिङ गरेको अफगानिस्तानले ५० ओभरमा सबै विकेट गुमाएर १६८ रनमात्र बनाउन सक्यो । कप्तान महबुब खानले ५८ रन बनाएको इनिङ्सलाई सस्तैमा समेट्ने क्रममा सन्तोष यादवले ३, सिब्रिन श्रेष्ठ र बिपिन शर्माले २–२ तथा अभिषेक तिवारी र अपराजित पौडेलले १–१ विकेट लिए ।
जवाफमा मैदानमा उत्रेको नेपालले ठोस शुरुआत गरेको छ ।
यू–१९ पुरुष विश्वकपको एसिया छनोटको तयारीस्वरुप नेपाल र अफगानिस्तानले अभ्यास खेलिरहेका हुन् ।
यसअघि बिहीबार भएको पहिलो खेलमा नेपाल अफगानिस्तानसँग १३० रनको फराकिलो अन्तरमा पराजित भएको थियो । अफगानिस्तानले तीन खेलको श्रृंखलामा १–० को अग्रता लिइसकेको छ ।
यो श्रृंखलामा हारबाट जोगिन नेपाललाई आजको खेल जित्नुपर्ने दबाब छ ।
अर्को साता नेपालमा नै आयोजना हुने एसिया छनोटमा नेपाल र अफगानिस्तान, हङकङ, यूएई र ओमानले प्रतिस्पर्धा गर्नेछन् ।
