अस्ट्रेलियामा अस्पताल भर्ना हुने दरमा तीव्र वृद्धि, प्रणालीमा दबाब बढ्दै
हाम्रा कुरा
प्रकाशित २०८२ जेठ १८ आइतबार
1.4k
Shares
क्यान्बेरा । अस्ट्रेलियाली स्वास्थ्य तथा कल्याण संस्थानको नयाँ रिपोर्टले विगत एक दशकमा अस्ट्रेलियाको अस्पताल प्रणालीमा ठूलो दबाब बढेको देखाएको छ। सार्वजनिक र निजी दुवै क्षेत्रमा आपतकालीन र योजनाबद्ध स्वास्थ्य सेवाको बढ्दो मागका कारण अस्पताल भर्ना हुने दर तीव्र गतिमा बढेको पाइएको हो।
रिपोर्टअनुसार, २०२३–२४ आर्थिक वर्षमा लगभग १ करोड २६ लाख अस्ट्रेलियालीहरूलाई अस्पताल भर्ना गरिएको थियो। यो संख्या २०१४–१५ को १०.२ मिलियनको तुलनामा निकै बढी हो। जनसंख्या वृद्धिले यसमा केही भूमिका खेलेको भए पनि, प्रति व्यक्ति भर्ना दरमा पनि वृद्धि भएको छ। २०१४–१५ मा प्रति १ हजार व्यक्तिमा ४०५ भर्ना हुने गरेकामा २०२३–२४ मा यो दर ४२१ प्रति १ हजार व्यक्ति पुगेको छ।
अस्पताल भर्ना भएका कुल बिरामीमध्ये ५९ प्रतिशत सार्वजनिक अस्पतालहरूले ह्यान्डल गरेका थिए। निजी अस्पतालहरू प्रायः योजनाबद्ध वा ऐच्छिक हेरचाहका लागि प्रयोग गरिन्छन्।
रिपोर्टमा उल्लेख भएअनुसार, कुल भर्नामध्ये ६९ प्रतिशत ऐच्छिक थिए (जसमा प्रायः योजनाबद्ध शल्यक्रियाहरू जस्ता निजी सुविधामा उपचार गरिएका थिए), जबकि ३१ प्रतिशत आपतकालीन प्रकृतिका थिए। आपतकालीन भर्नाहरूमध्ये अधिकांशलाई सार्वजनिक अस्पतालहरूले सेवा प्रदान गरेका थिए।
अस्पतालमा बिरामी बस्ने औसत अवधि २.७ दिन थियो, र धेरैजसो भर्नाहरू (६३ प्रतिशत) एकै दिनमा डिस्चार्ज भएका थिए।
विगत एक दशकमा गैर-भर्ना हेरचाह (जस्तै बाहिरी बिरामी सेवा) मा पनि उल्लेखनीय वृद्धि देखिएको छ। बाहिरी बिरामी सेवाका घटनाहरू २०१४–१५ मा ३४.९ मिलियनबाट बढेर २०२३–२४ मा ४०.९ मिलियन पुगेका छन्।
यो रिपोर्टले अस्ट्रेलियाको स्वास्थ्य सेवा प्रणालीमा बढ्दो चापलाई स्पष्ट पार्छ, जसले भविष्यमा थप चुनौतीहरू सिर्जना गर्न सक्ने संकेत गर्छ।
