पोखरा । पोखरामा जारी गण्डकी प्रदेश तेस्रो टि-२० क्रिकेट प्रतियोगितामा पर्वतले नवलपुरविरुद्ध जित हात पारेको छ । पर्वतले नवलपुरलाई १५ रनले पराजित गर्दै महत्वपूर्ण जित हात पारेको हो ।
यस्तै अर्को खेलमा कास्कीले गोरखाविरुद्ध १० विकेटले जित हात पारेको छ । योसँगै समूह बीको समीकरण रोचक मोडमा पुगेको छ ।
कास्की दुई खेलमा दुई खेल नै जित्दै चार अंकका साथ अग्रस्थानमा रहँदा पर्वत र नवलपुर एक,एक खेल जित्दै समान दुई-दुई अंकका साथ दोस्रो र तेस्रो स्थानमा छन् ।
बिहीबार हुने खेलले फाइनल पुग्ने टिमको टुङ्गो लाग्ने प्रतियोगिता संयोजक ऋषिराम गौतमले जानकारी दिए । बिहीबार खेल गोरखा र पर्वत तथा दोस्रो खेल कास्की र नवलपुर बीच हुनेछ ।
प्रतियोगिता दुई समूहमा विभाजनमा गरी सञ्चालन भएको छ । समूह ‘ए’ मा स्याङजा, बाग्लुङ, तनहुँ र म्याग्दी रहँदा समूह ‘बी’ मा कास्की, नवलपुर, पर्वत र गोरखा छन् । प्रत्येक दिन दुई खेल हुनेछन् ।
प्रतियोगिता विजेताले नगद एक लाख, उपविजेताले ५० हजार रुपैयाँ नगद पुरस्कार, ट्रफी, मेडल र प्रमाणपत्र प्राप्त गर्नेछ ।
यस्तै, उत्कृष्ट खेलाडी, उत्कृष्ट ब्याटर, बलर र उदीयमान खेलाडीलाई नगद पुरस्कार र ट्रफी प्रदान गरिनेछ ।
हरेक खेलको ‘प्लेयर अफ द म्याच’ बन्नेले एक हजार नगद र ट्रफी प्राप्त गर्ने प्रतियोगिता संयोजक ऋषिराम गौतमले जानकारी दिए ।
