काँकडभिट्टा नाकाबाट ११ महिनामा १८ अर्बको पेट्रोलियम पदार्थ आयात
हाम्रा कुरा
प्रकाशित २०८२ असार १० मंगलबार
554
Shares
भद्रपुर (झापा)। चालु आर्थिक वर्ष २०८१/८२ को ११ महिनामा पूर्वीनाका काँकडभिट्टाबाट १८ अर्ब चार करोड ६० लाख रुपैयाँ बराबरको पेट्रोलियम पदार्थ आयात भएको छ। यस अवधिमा पेट्रोल, डिजेल, एलपी ग्यास, एटीएफ (विमान इन्धन), र मट्टितेल नेपाल भित्रिएको हो।
मेची भन्सार कार्यालयका सूचना अधिकारी तथा भन्सार अधिकृत ईश्वरकुमार हुमागाईँका अनुसार, गत आर्थिक वर्षको सोही अवधिको तुलनामा पेट्रोलियम पदार्थको आयात एक अर्ब छ करोड ४३ लाख रुपैयाँ (५.६० प्रतिशत) ले घटेको छ। आयातमा कमी आए पनि पेट्रोलियम पदार्थबाट प्राप्त राजस्व भने ५.७० प्रतिशत (४७ करोड ४३ लाख ८७ हजार रुपैयाँ) ले बढेको छ। यसबाट चालु आवको ११ महिनामा पेट्रोलियम पदार्थ आयातबाट आठ अर्ब ७८ करोड २७ लाख ७२ हजार रुपैयाँ राजस्व सङ्कलन भएको कार्यालयको तथ्याङ्कमा उल्लेख छ।
यस अवधिमा आठ अर्ब ११ करोड ५९ लाख रुपैयाँ मूल्य बराबरको ९३ हजार आठ सय २४ किलोलिटर पेट्रोल आयात भएको थियो। त्यस्तै, छ अर्ब २६ करोड ७१ लाख रुपैयाँ मूल्य पर्ने ६८ हजार आठ सय २० किलोलिटर डिजेल भित्रिएको छ।
अन्य पेट्रोलियम पदार्थतर्फ, दुई अर्ब ५९ करोड रुपैयाँ मूल्य पर्ने २३ हजार चार सय ३८ मेट्रिक टन एलपी ग्यास आयात भएको छ। यसका साथै, ६१ करोड २० लाख रुपैयाँ मूल्य बराबरको छ हजार सात सय आठ किलोलिटर एटीएफ र २२ करोड ७१ लाख रुपैयाँ मूल्य बराबरको दुई हजार पाँच सय २० किलोलिटर मट्टितेल पूर्वीनाकाबाट भित्रिएको मेची भन्सार कार्यालयले जनाएको छ।
आयात घटेर पनि राजस्व बढ्नुले पेट्रोलियम पदार्थको मूल्य समायोजन वा कर नीतिमा भएको परिवर्तनलाई सङ्केत गर्छ। यो प्रवृत्तिले देशको आयात व्यापार र राजस्व सङ्कलनमा कस्तो प्रभाव पार्ला भन्ने विषय महत्त्वपूर्ण छ।
