फुङ्लिङ। ताप्लेजुङको सिदिङ्बा गाउँपालिकाको सीमा क्षेत्रमा रहेको ढङ्ढङ्गे झरना, जसको नामै जलको बहाव र चट्टानको सङ्घर्षबाट उत्पन्न हुने सङ्गीतमय आवाजबाट प्रेरित छ, अहिले बिस्तारै पर्यटकीय गन्तव्यका रूपमा चिनिन थालेको छ। सिदिङ्वा–५ लिम्बुदिन र ६ मेहेलेको बीचमा अवस्थित यो झरनाको प्राकृतिक सुन्दरता अद्वितीय छ, जसले यहाँ पुग्ने जो कोहीलाई मोहित बनाउँछ।

स्थानीय असलबहादुर राईका अनुसार, पहिले फावाखोला भनिने यो झरना अहिले ’ढङ्ढङ्गे’ नामले परिचित छ किनभने यसबाट बाजाबजाए जस्तो आवाज आउँछ। पछिल्लो समयमा यहाँ आन्तरिक पर्यटकको सङ्ख्या बढ्दै गएको छ र स्थानीय बासिन्दा अब बाह्य पर्यटकलाई पनि आकर्षित गर्न सकिने आशामा छन्। स्थानीय नारायणप्रसाद राई भन्छन्, "हामी त पर्खिराखेका छौं। बाहिरबाट पनि पर्यटक आएर आम्दानीको स्रोत बनोस् भनेर।"

झरनामा पुग्ने आन्तरिक पर्यटकहरूले यहाँको दृश्य सुन्दर मात्र नभई आत्मामा शान्ति दिने किसिमको अनुभूति हुने बताएका छन्। आन्तरिक पर्यटक साहारा लिम्बूले आफ्नो अनुभव सुनाउँदै भनिन्, "नाम सामान्य लाग्यो तर दृश्य हेर्दा मुखमै मुस्कान आयो। यस्तो प्राकृतिक उपहार देख्दा मन रमायो।"

झरनालाई पर्यटकीय क्षेत्र बनाउनका लागि स्थानीय सरकार पनि सक्रिय देखिन्छ। झरनासम्म पुग्न ढुङ्गाका गोरेटो बाटा बनाइएका छन् भने होमस्टे निर्माणको तयारी भइरहेको छ। सिदिङ्बा गाउँपालिका उपाध्यक्ष बन्दना कडरीयाले आगामी नीति तथा कार्यक्रममा ढङ्ढङ्गे झरनालाई विशेष प्राथमिकता दिइएको बताएकी छन्।

यद्यपि, झरनाको आधिकारिक लम्बाइ मापन गरिएको छैन र वैज्ञानिक दृष्टिकोणले यसको अध्ययन आवश्यक रहेको औंल्याइएको छ। पर्याप्त प्रचारप्रसार गर्न सकेमा यो झरना ताप्लेजुङ जिल्लाको अर्को महत्त्वपूर्ण पर्यटकीय परिचय बन्न सक्छ।

जिल्ला सदरमुकाम फुङ्लिङ बजारदेखि पाँचथरको गणेश चोक हुँदै करिब तीन घण्टामा साब्लाखु भञ्ज्याङ पुग्न सकिन्छ। साब्लाखुदेखि करिब ४० मिनेटपछि ढङ्ढङ्गे झरनासम्म पुग्न सकिन्छ। झरनासम्मै सहज रूपमा मोटर बाटो विस्तार भएकाले सवारीसाधन सहजै पुग्दै आएका छन्। मिक्वाखोलाको फुङफुङगे झरना जस्तै ढङ्ढङ्गे पनि ताप्लेजुङको लुकेको पर्यटकीय सम्भावनाको एक उदाहरण हो।