इटहरी (सुनसरी)। पूर्वीपृतना मुख्यालय, इटहरीमा आयोजित ’पृतनापति ट्रफी, २०८२’ मा श्री नं १८ बाहिनी अड्डा ८४ पदकका साथ पहिलो स्थान हासिल गर्न सफल भएको छ। १८ नम्बर बाहिनीले ३२ स्वर्ण, २२ रजत र ३० कास्य पदक प्राप्त गरेको हो।
भलिबल, फुटबल, बास्केटबल, तेक्वान्दो, बक्सिङ, पौडी, जुडो र एथ्लेटिक्स गरी आठ खेल समावेश गरिएको यस प्रतियोगितामा श्री नं २१ बाहिनी अड्डा दोस्रो र श्री नं २ बाहिनी अड्डा तेस्रो भएका छन्।
आइतबार सम्पन्न प्रतियोगितामा पूर्वीपृतना हेडक्वाटरका पृतनापति उपरथी गौरवकुमार केसीले विजेता खेलाडीहरूलाई ट्रफी तथा प्रमाणपत्र वितरण गरे। ’स्वास्थ्य, मित्रता एवं राष्ट्रका लागि खेलकुद’ भन्ने नाराका साथ आयोजित यस प्रतियोगिताको मुख्य उद्देश्य शारीरिक क्षमता अभिवृद्धि गर्दै अनुशासित तथा सक्षम सुरक्षाकर्मी उत्पादन गर्नु रहेको उपरथी केसीले बताए।
कार्यक्रममा २, १८ र २१ नम्बर बाहिनी अड्डाका बाहिनीपति, गणपति, गुल्मपति तथा अन्य उच्च सैनिक अधिकृतहरूका साथै कोशी प्रदेश खेलकुद विकास बोर्डका सदस्य सचिव पर्शुराम बस्नेत, सहायक रथी मणिकुमार श्रेष्ठ, महासेनानी मदनजङ्ग राणा, सहायक रथी गौरव गुरुङ लगायतको उपस्थिति थियो।
प्रतियोगितामा खेलाडी, रेफ्री, अफिसियल र व्यवस्थापकसहित कुल ४८६ जनाको सहभागिता रहेको पूर्वीपृतना मुख्यालयले जनाएको छ।
