त्रिवि क्रिकेट मैदानमा दैनिक दुई लाख हर्जना तिरेर काम गर्दै ठेकेदार कम्पनी [फोटोफिचर]
मंगलबारदेखि दैनिक हर्जना तिरेर काम, काम नसक्दासम्म दैनिक हर्जना, हर्जना तिरेर बढीमा २०० दिनसम्म अर्थात् आयोजनाको कूल रकमको १० प्रतिशत हर्जना हुने अवधिसम्म काम गर्न पाइने कानूनी व्यवस्था
हाम्रा कुरा
प्रकाशित २०८२ साउन १ बिहिबार
627
Shares
तस्बिर – नेपाल फोटो लाइब्रेरी ।
काठमाडौँ । कीर्तिपुरस्थित त्रिवि क्रिकेट मैदान स्तरोन्नति गरी पारापिट बनाउने र फ्लड लाइट हाल्ने काम धमाधम भइरहेको छ ।
समयमा काम नसकेपछि सरकारले ठेकेदार कम्पनीलाई हर्जना लगाएको छ । सम्झौताअनुसार आयोजनाको कूल रकमको शून्य दशमलव शून्य पाँच प्रतिशत दैनिक हर्जना तिर्नुपर्नेछ । दैनिक दुई लाखभन्दा बढी क्षतिपूर्तिबापत रकम दिनुपर्ने सहरी विकास मन्त्रालयले जनाएको छ ।
मैदानको पारापिट बनाउन बीकेओआई केसीडीसी बिजीको जोइन्ट भेन्चर कम्पनी (जेभी) र फ्लड लाइट जडानका लागि विशन ईश्वरी जेभीले गत फागुन १९ र २२ गते मन्त्रालय मातहतको संघीय सचिवालय निर्माण तथा व्यवस्थापन कार्यालयसँग सम्झौता गरेका थिए ।
पारापिट बनाउन ४९ करोड २५ लाख र फ्लड लाइट जडानका लागि ४७ करोड ३७ लाखमा सम्झौता भएको थियो । यही असार ३० गते ठेकेदार कम्पनीलाई निर्धारित समयमा काम नसकेपछि हर्जना लाग्ने जानकारी गराइएको थियो ।
मंगलबारदेखि दैनिक हर्जना तिरेर काम भइरहेको छ। काम नसक्दासम्म दैनिक हर्जना लाग्नेछ । यसरी हर्जना तिरेर बढीमा २०० दिनसम्म अर्थात् आयोजनाको कूल रकमको १० प्रतिशत हर्जना हुने अवधिसम्म काम गर्न पाइने कानूनी व्यवस्था छ । सो अवधिमा पनि काम नसके कालोसूचीमा राख्ने व्यवस्था छ ।
निर्माण कम्पनीले एक महिनामा काम सक्ने प्रतिवद्धता जनाएको कार्यालयले जनाएको छ। अहिले चार हजार कुर्सी जडान भइसकेका छन् भने छ वटा फ्लड लाइटमध्ये तीन वटा पोल आएको छ ।
पारापिटतर्फ वित्तीय प्रगति ६३ प्रतिशत र भौतिक प्रगति ७७ प्रतिशत भएको छ । फ्लड लाइट जडानतर्फ २९ प्रतिशत वित्तीय र ४५ प्रतिशत भौतिक प्रगति भएको छ।
प्रधानमन्त्री केपी शर्मा ओलीले आफू चौथो कार्यकाल प्रधानमन्त्री हुँदा गत वर्ष असार अन्तिममा पहिलो निर्णय नै तीन सय दिनभित्र उक्त मैदानमा पारापिट र फ्लड लाइट हार्ने निर्णय गरेका थिए ।
तीन सय दिनमात्र हैन ओली सरकारले एक वर्षे कार्यकाल पनि पूरा गरेको छ । तर पहिलो निर्णयको काम पनि पूरा गरेको छैन ।
