गाजामा विश्वकै ‘सबैभन्दा’ खराब मानवीय अवस्था छ - अष्ट्रेलियाली प्रधानमन्त्री
हाम्रा कुरा
प्रकाशित २०८२ साउन ९ शुक्रबार
1.5k
Shares
काठमाडौँ । अष्ट्रेलियाका प्रधानमन्त्री एन्थोनी अल्बानिजले गाजाको मानवीय अवस्थालाई 'खराव र विनाश' को रूपमा वर्णन गर्दै इजरायललाई यस क्षेत्रमा सहायताको अवरोध तत्काल रोक्न आह्वान गरेका छन्। शुक्रबार जारी एक विज्ञप्तिमा अल्बानिजले गाजाको अवस्था विश्वको 'सबैभन्दा' खराब भएको बताएका हुन्।
अल्बानिजले गाजा मानवीय विपत्तिको चपेटामा रहेको अवस्थामा इजरायलले सहयोग गर्न अस्वीकार गरे पनि पानी र खानाको पहुँच खोज्ने बालबालिका लगायत नागरिकहरूको हत्याको रक्षा गर्न वा बेवास्ता गर्न नसकिने बताएका छन्। उनले इजरायललाई अन्तर्राष्ट्रिय कानून अन्तर्गत आफ्ना दायित्वहरूको पालना गर्न आह्वान गर्दै संयुक्त राष्ट्रसङ्घ (यूएन) र गैरसरकारी संस्थाहरूलाई आफ्नो जीवन बचाउने काम गर्न अनुमति दिन र प्यालेस्टिनीको जबरजस्ती विस्थापनको प्रस्ताव त्याग्न आग्रह गरेका छन्।
यो विज्ञप्ति फ्रान्सका राष्ट्रपति इमानुएल म्याक्रोँले सेप्टेम्बरमा संयुक्त राष्ट्र महासभामा फ्रान्सले प्यालेस्टिनी राज्यलाई औपचारिक रूपमा मान्यता दिने घोषणा गरेको केही घण्टापछि जारी गरिएको हो।
प्रधानमन्त्री अल्बानिजले अष्ट्रेलियाले युद्धविरामलाई सहज बनाउनका लागि सबै अन्तर्राष्ट्रिय प्रयासहरूलाई समर्थन जारी राखेको र इजरायली तथा प्यालेस्टिनी जनता ‘अन्तर्राष्ट्रिय मान्यता प्राप्त सीमा’ भित्र शान्ति र सुरक्षामा बस्न सक्ने भविष्यका लागि प्रतिबद्ध रहेको बताएका छन्। उनले निर्दोषको जीवन रक्षा गरी गाजाका जनताको पीडा र भोकमरी अन्त्य गर्न अहिले सबै प्रयासहरू गरिनु पर्नेमा जोड दिएका छन्।
अष्ट्रेलियाले सोमबार फ्रान्ससहित २७ अन्य देशहरूसँग मिलेर गाजामा युद्धको तत्काल अन्त्यका लागि आह्वान गरेको थियो।
