चन्द्र टण्डन र राजदूत पौडेलबीच वैदेशिक लगानी र रेमिट्यान्सको उत्पादक उपयोगबारे रणनीतिक छलफल
हाम्रा कुरा
प्रकाशित २०८२ साउन २१ बुधबार
443
Shares
काठमाडौँ। सिटी एक्सप्रेस मनी ट्रान्सफरका संस्थापक तथा ग्लोबल बिजनेस तथा डायस्पोरा समिति (सीएनआई) का सभापति चन्द्र टण्डन र पोर्चुगलस्थित नेपाली राजदूत महामहिम प्रकाशमणि पौडेलबीच नेपालमा वैदेशिक प्रत्यक्ष लगानी (एफडीआई) भित्र्याउने रणनीति, प्रविधि स्थानान्तरण, रेमिट्यान्सको उत्पादनशील प्रयोग तथा पर्यटन प्रवर्द्धनका विषयमा विस्तृत छलफल भएको छ।
उक्त छलफलमा नेपालमा वैदेशिक लगानीको प्रवाह बढाउन दीर्घकालीन रणनीति आवश्यक रहेको उल्लेख गर्दै दुवै पक्षले उत्पादनशील क्षेत्रहरूमा रेमिट्यान्स लगानीलाई सहयोग गर्ने औपचारिक नेटवर्कहरूको स्थापना गर्नुपर्नेमा जोड दिए। साथै, प्रविधि स्थानान्तरणलाई समेत प्राथमिकतामा राख्दै नेपाललाई साहसिक पर्यटन, सांस्कृतिक सम्पदा, तथा आध्यात्मिक रिट्रीट को शीर्ष गन्तव्य बनाउने विषयमा सहमति जनाइएको थियो।
राजदूत पौडेलले पोर्चुगलमा रहेका नेपाली आप्रवासी समुदायका समस्याहरू समाधानका लागि आफू निरन्तर क्रियाशील रहेको जानकारी दिए। उनले नेपाली आप्रवासीहरूको कल्याण र अधिकार सुनिश्चितता का लागि दूतावासबाट भइरहेको पहलबारे जानकारी गराउँदै, नेपाली उत्पादनहरूलाई पोर्चुगलमा प्रवर्द्धन गर्न प्रभावकारी योजना बनाइरहेको समेत बताए।
छलफलका क्रममा नेपाली दूतावास (पोर्चुगल) र सीएनआईबीचको दीर्घकालीन संस्थागत सहकार्य को सम्भावनाबारे समेत विचार-विमर्श भएको थियो। टण्डनले प्रवासी नेपाली समुदायले मातृभूमिमा लगानी गर्ने वातावरण सहज बनाउनेतर्फ नेपाल सरकार तथा सम्बन्धित निकायको सक्रियता आवश्यक रहेको धारणा राखेका थिए।
यो छलफलले नेपाल–पोर्चुगल आर्थिक तथा सांस्कृतिक सम्बन्ध सुदृढ गर्दै, भविष्यमा प्रवासी नेपाली र विदेशी साझेदारबीचको सहकार्यलाई नयाँ उचाइमा पुर्याउने अपेक्षा गरिएको छ।
