काठमाडौँ । वैज्ञानिकहरूले चिलीको प्याटागोनिया क्षेत्रमा डायनासोरको युगमा बाँचेको मुसाको आकारको एक सानो स्तनपायीको जीवाश्म फेला पारेका छन्। ‘येउथेरियम प्रेसर’ नाम दिइएको यो स्तनपायी करिब ७ करोड ४० लाख वर्ष पहिले माथिल्लो क्रिटेसियस कालमा रहेको अनुमान गरिएको छ।
यसको तौल ३० देखि ४० ग्राम (लगभग एक औँस) रहेको थियो। यो जीवाश्म दक्षिण अमेरिकाको यस क्षेत्रमा फेला परेको अहिलेसम्मकै सबैभन्दा सानो स्तनपायी हो। चिली विश्वविद्यालयका वैज्ञानिक हान्स पुस्चेलका अनुसार, जीवाश्ममा एउटा दाँतसहितको बङ्गाराको सानो टुक्रा र अन्य दुई दाँतका मुकुट र जरा भेटिएको छ।
यो खोज यस महिना बेलायती वैज्ञानिक पत्रिका ‘प्रोसिडिङ्स अफ द रोयल सोसाइटी बी’ मा प्रकाशित भएको थियो। अनुसन्धानकर्ताहरूले स्यान्टियागोबाट करिब ३,००० किलोमिटर दक्षिणमा रहेको चिलीको मागालेन्स क्षेत्रको रियो डे लास चिनस उपत्यकामा यो जीवाश्म फेला पारेका हुन्।
‘येउथेरियम प्रेसर’ मुसाजस्तो देखिए पनि यो एक स्तनपायी थियो जसले प्लेटिपसजस्तै अण्डा पारेको वा कङ्गारु वा ओपोसमजस्तै थैलीमा बच्चा बोकेको हुनसक्ने अनुमान गरिएको छ। यसको दाँतको आकारले यो अपेक्षाकृत कडा वनस्पति खाने गरेको संकेत गर्छ। यो सानो स्तनपायी पनि डायनासोरहरूसँगै करिब ६ करोड ६० लाख वर्ष पहिले क्रिटेसियस कालको अन्त्यमा लोप भएको थियो।
