काठमाडौँ। प्रख्यात आयरल्यान्डेली हास्यव्यङ्ग्य लेखक ग्राहम लाइनहानको गिरफ्तारीले बेलायतमा अभिव्यक्ति स्वतन्त्रताको विषयमा ठूलो विवाद निम्त्याएको छ। तेस्रोलिङ्गी समुदायबारे सामाजिक सञ्जालमा पोस्ट गरेको आरोपमा उनलाई सोमबार लन्डनको हिथ्रो विमानस्थलमा सशस्त्र प्रहरीले पक्राउ गरेको थियो।
अमेरिकी राष्ट्रपति डोनाल्ड ट्रम्पका सहयोगी नाइजेल फराजले यो घटनालाई बेलायतमा स्वतन्त्रताविरुद्धको युद्धको उदाहरण भन्दै अमेरिकी कंग्रेसमा समेत बहसको विषय बनाएका छन्। उनले भने, "अभिव्यक्ति स्वतन्त्रतामाथि आक्रमण भइरहेको छ र म अमेरिकालाई सतर्क रहन आग्रह गर्दछु।"
लन्डनको महानगरीय प्रहरीका अनुसार लाइनहानलाई सामाजिक सञ्जाल 'एक्स' मा गरिएका पोस्टका कारण हिंसा भड्काएको आशङ्कामा पक्राउ गरिएको हो। ह्यारी पोटरकी लेखिका जेके रोलिङले लाइनहानको गिरफ्तारीलाई "नितान्त निन्दनीय" र "अधिनायकवाद" को संज्ञा दिएकी छन्। त्यस्तै, एक्सका मालिक एलन मस्कले बेलायतलाई "प्रहरी राज्य" भनेर कडा टिप्पणी गरेका छन्।
प्रहरीले विमानस्थलमा सशस्त्र अधिकारीहरू खटाउनु सामान्य कुरा भएको र पक्राउको समयमा बन्दुकको प्रयोग नगरिएको स्पष्ट पारेको छ। लाइनहानका अनुसार, यो पक्राउ ‘पार-लैङ्गिक’ पुरुषहरू महिलाको ठाउँमा भएमा उनीहरूको कार्य हिंस्रक हुने भन्दै लेखिएका तीनवटा पोस्टसँग सम्बन्धित छ। उनले ती पोस्ट 'ट्रान्सफोबिक' भएको भनेर आलोचना समेत खेपेका थिए।
यस विषयमा स्वास्थ्यमन्त्री वेस स्ट्रिटिङले भने प्रहरीले ट्वीटभन्दा सडकमा प्रहरी परिचालनमा ध्यान केन्द्रित गर्नुपर्ने बताएका छन्। लाइनहानलाई बिहीबार तेस्रोलिङ्गी व्यक्तिविरुद्ध उत्पीडन र आपराधिक क्षतिको आरोपमा लन्डनको अदालतमा उपस्थित गराइनेछ।
यो घटनाले बेलायतमा हालै प्यालेस्टाइन एक्सन अभियान समूहका सयौं सदस्यहरू पक्राउ परेको घटनासँग जोडेर अभिव्यक्ति स्वतन्त्रतामाथिको बहसलाई थप चर्काएको छ।
