काठमाडौं। नर्वेको ओस्लोस्थित विमानस्थल नजिकै प्रतिबन्धित क्षेत्रमा एक विदेशीले सञ्चालन गरेको ड्रोनलाई नर्वेका अधिकारीहरूले नियन्त्रणमा लिएका छन्। यस हप्ता नर्वे र डेनमार्कमा धेरै उडानहरू अवरुद्ध भएपछि अधिकारीहरूले थप सतर्कता अपनाएका छन्।
नर्वेको पूर्वी प्रहरी जिल्लाका अभियोजन प्रमुख लिसा मारी लोक्केले बिहीबार घटनाबारे जानकारी दिएकी हुन्। उनका अनुसार बुधबार राति करिब ९ बजे प्रहरीलाई ओस्लो विमानस्थलको 'नो फ्लाई जोन' मा ड्रोन प्रवेश गरेको सूचना प्राप्त भएको थियो। प्रहरी घटनास्थलमा पुग्दा ५० वर्ष नाघेका एक व्यक्तिले ड्रोन चलाइरहेको भेट्टाएपछि प्रहरीले उक्त उपकरण जफत गरेको छ।
लोक्केले बुधबार साँझ भएको यो घटनाले हवाई यातायातमा कुनै असर नपारेको स्पष्ट पारेकी छन्। ती व्यक्तिलाई पक्राउ नगरिए पनि प्रहरीले सोधपुछ भने गर्नेछ।
स्क्यान्डिनेभियन विमानस्थलहरूमा हालै ड्रोन देखिएको रिपोर्टपछि कोपनहेगन र ओस्लोसहितका विमानस्थलहरूमा अस्थायी रूपमा आवागमन अवरुद्ध भएको थियो। यसै क्रममा, सोमबार रातिदेखि मङ्गलबारसम्म ओस्लो विमानस्थलको हवाई यातायात करिब तीन घण्टाका लागि बन्द गरिएको थियो। यद्यपि, लोक्केले बुधबारको घटना र यसअघिका उडान अवरुद्धका घटनाहरूबीच हालसम्म कुनै जोखिमयुक्त सम्बन्ध नदेखिएको बताएकी छन्।
