काठमाडौं। भारतका पूर्व घरेलु क्रिकेटर तथा प्रशासक मिथुन मनहास आइतबार भारतीय क्रिकेट नियन्त्रण बोर्ड (बीसीसीआई) का नयाँ अध्यक्षमा सर्वसम्मतिले निर्वाचित भएका छन्। मुम्बईमा सम्पन्न बोर्डको वार्षिक साधारण सभापछि उनलाई औपचारिक रूपमा अध्यक्ष घोषणा गरिएको हो।
मनहासले ७० वर्षको अनिवार्य सेवानिवृत्तिमा पुगेका रोजर बिन्नीलाई प्रतिस्थापन गरेका छन्। बोर्डको नयाँ नेतृत्वमा राजीव शुक्ला उपाध्यक्ष र देवजित साइकिया सचिवमा निर्वाचित भएका छन्।
४५ वर्षीय मनहासले भारतका लागि अन्तर्राष्ट्रिय क्रिकेट नखेले पनि घरेलु क्रिकेटमा उनको प्रदर्शन उत्कृष्ट थियो। दिल्लीको तर्फबाट खेल्दा उनले १५७ प्रथम श्रेणी म्याचमा ४५.८२ को औसतसहित नौ हजार ७१४ रन बनाएका थिए। उनलाई भारतीय महान खेलाडीहरू सचिन तेन्दुलकर, राहुल द्रविड, सौरभ गाङ्गुली र भिभिएस लक्ष्मण को युगसँग मेल खाएको कारण राष्ट्रिय टोलीमा प्रवेश गर्ने मौका सीमित रहेको मानिन्छ।
घरेलु क्रिकेटमा उनी वीरेन्द्र सेहवाग र गौतम गम्भीरको छायाँमा परे पनि ती स्टारहरू राष्ट्रिय कर्तव्यमा व्यस्त हुँदा मनहासले धेरै पटक दिल्ली टोलीको नेतृत्व गरेका थिए। इन्डियन प्रिमियर लिग (आईपीएल) मा उनले ५० भन्दा बढी खेल खेलेका छन्।
खेल जीवनपछि मनहास क्रिकेट प्रशासनमा चम्किएका थिए। उनले विशेषगरी जम्मु र काश्मीर क्रिकेट सङ्घको निर्देशक रहँदा आधारभूत स्तरको विकासमा महत्त्वपूर्ण योगदान दिएका थिए।
भारतमा क्रिकेटको अपार लोकप्रियताले बीसीसीआईलाई विश्वकै धनी खेल निकाय बनाएको छ। यस शक्तिशाली बोर्डको नेतृत्वमा मनहासको उदयलाई सत्तारूढ भारतीय जनता पार्टी (भाजपा) को स्पष्ट समर्थन रहेको बताइन्छ। भारतीय सञ्चारमाध्यमका अनुसार, गत हप्तामात्रै नयाँदिल्लीमा गृहमन्त्री अमित शाह को निवासमा भएको महत्त्वपूर्ण बैठकमा उनलाई उम्मेदवारका रूपमा छनोट गरिएको थियो।
मनहासको निर्वाचनले भारतीय क्रिकेटमा नयाँ प्रशासनिक अध्याय सुरु भएको मानिएको छ।
