काठमाडौँ । गत हप्तामा डेनमार्कका विमानस्थल र सैन्य अड्डामा भएका ड्रोन आक्रमणपश्चात् सुरक्षा, रक्षा र युक्रेन युद्धबारे छलफल गर्न युरोपेली नेताहरू बुधबार कोपनहेगनमा दुई शिखर सम्मेलनका लागि भेला भएका छन् ।
डेनमार्कको रक्षा मन्त्रालयका अनुसार कोपनहेगन विमानस्थलमा निगरानी मजबुत बनाउन उच्चस्तरीय राडार प्रणाली जडान गरिएको छ । अज्ञात ड्रोनले एक साताअघि हवाई क्षेत्र बन्द गर्न बाध्य पारेपछि हवाई यातायातमा ठूलो अवरोध आएको थियो ।
फ्रान्स, जर्मनी, नेदरल्यान्ड्स, स्विडेन र बेलायतले शिखर सम्मेलन अघि नै डेनमार्कमा विमान, युद्धपोत र हवाई रक्षा प्रणाली पठाइसकेका छन् ।
युक्रेनले पनि आफ्ना विशेषज्ञहरूलाई पठाई नर्डिक देशहरूसँग संयुक्त अभ्यास शुरू गरेको छ, जसले रूसी ड्रोन आक्रमणविरुद्धको अनुभव बाँड्नेछ ।
डेनमार्ककी प्रधानमन्त्री मेट्टे फ्रेडरिक्सनले सोमबार सामाजिक सञ्जालमार्फत भनेका थिए, “हामीले निष्कर्ष निकाल्न सक्दैनौँ कि यस घटनाको पछाडिको देश कुन हो, तर एउटै स्पष्ट कुरा छ-रूस नै युरोपको सुरक्षामा प्रत्यक्ष खतरा बनेको छ ।”
बुधबारको युरोपेली सङ्घ (इयु) शिखर सम्मेलनको प्रमुख विषय रूस हुनेछ । सम्मेलनमा सन् २०३० सम्म युरोपले सम्भावित आक्रमणलाई कसरी रोक्ने भन्ने विषयमा छलफल हुनेछ ।
यसबीच, अमेरिकी ध्यान एसिया र अन्य क्षेत्रमा केन्द्रित भएकाले युरोपेली सुरक्षामा स्वावलम्बी हुने आवश्यकता बढी रहेको नेताहरूले बताएका छन् ।
युक्रेनी राष्ट्रपति भोलोदिमर जेलेन्स्कीले भिडियो सन्देशमार्फत इयु नेताहरूसँग सम्बोधन गर्ने कार्यक्रम छ ।
युरोपेली गुप्तचर संस्थाहरूको आकलनअनुसार रूसले आगामी तीनदेखि पाँच वर्षभित्र युरोपका अन्य क्षेत्रमा आक्रमण गर्ने सम्भावना छ ।
राष्ट्रपति भ्लादिमिर पुटिन नाटोको प्रतिबद्धता परीक्षण गर्न इच्छुक रहेको र अमेरिकी राष्ट्रपति डोनाल्ड ट्रम्पको नाटोप्रतिको अडान अस्पष्ट भएकाले थप शङ्का बढेको बताइएको छ ।
गत सेप्टेम्बर १० मा रूसी ड्रोनहरूले पोल्यान्डको हवाई क्षेत्र उल्लङ्घन गर्दा नाटो विमानहरूले केहीलाई खसाल्न बाध्य भएका थिए । यो सन् २०२२ फेब्रुअरी २४ मा युक्रेनविरुद्ध युद्ध शुरू भएपछि नाटो र मस्कोबीचको पहिलो प्रत्यक्ष भिडन्त थियो ।
सो घटनाले युरोपभरि नै रूसविरुद्धको तयारीबारे गम्भीर प्रश्न उठाएको थियो । केही दिनमै नाटो जेटहरूले एस्टोनियाको हवाई क्षेत्रमा प्रवेश गरेका तीनवटा रूसी लडाकू विमानलाई बाहिर निकाल्नुपरेको थियो ।
युक्रेनसम्बन्धी इयु वार्ताले द्वन्द्वग्रस्त देशलाई निरन्तर सैन्य तथा आर्थिक सहयोगबारे केन्द्रित गर्नेछ । यस क्रममा युक्रेनलाई सहयोग गर्न फ्रिज गरिएका रूसी सम्पत्तिहरू प्रयोग गर्ने प्रस्तावमाथि समेत छलफल हुने अपेक्षा गरिएको छ ।
बेलायतका प्रधानमन्त्री किर स्टार्मरलगायत युरोपभरिका शीर्ष नेताहरू बुधबार साँझ युरोपेली राजनीतिक समुदाय (इपिसी) को रात्रिभोजमा सहभागी हुनेछन् । करिब ४० राष्ट्र वा सरकारका प्रमुखहरू कार्यक्रममा उपस्थित हुनेछन् ।
इपिसी नेताहरू बिहीबार पुनः भेला भई सुरक्षा, मानव बेचबिखन र आप्रवासनका मुद्दामा विशेष छलफल गर्नेछन् ।
तर आलोचकहरूले यस फोरमलाई ‘राजनीतिक बोल्ने पसल’ मात्र भनेका छन्, जसले ठोस परिणाम दिन नसक्ने गरेको आरोप छ । एजेन्सी
