अपडेट

काठमाडौँ । नेपाल टी–२० विश्वकपमा छानिने लगभग पक्का भएको छ । कतारमाथि सनसनीपूर्ण ५ रनको जित हासिल गर्दै नेपाल भारत–श्रीलंकाको संयुक्त आयोजनामा आगामी फेब्रुअरीमा आयोजना हुने टी–२० विश्वकपमा छानिने लगभग पक्का जस्तै भएको हो । 

विश्वकप छनोट नजिक पुगेको भए पनि बुधबार ओमानविरुद्ध हुने खेलले विश्वकपको सुनिश्चितता निश्चित गर्नेछ । सुपर सिक्समा नेपाल र ओमानको समान ६ अंक छ । यूएई र जापानको समान २ अंक छ ।

१४८ रनको विजयी चुनौती लिएर मैदानमा उत्रिएको कतारले एक बल खेल्न बाँकी छँदै सबै विकेट गुमाएर १४२ रन बनाएपछि नेपाल ५ रनले विजयी भएको हो । 

१४८ रनको चुनौती पछ्याउने क्रममा कतारले १४२ रन बनायो । कुनै समय १२ ओभरमा १ विकेटको क्षतिमा ९७ रन बनाएर जित नजिक पुगेको कतारले त्यसपछि लगातार विकेट गुमाउँदा हार बेहोर्न पुगेको हो । 

कतारका लागि ओपनरद्धय इमाल लियानागेले ५६ तथा जुबेर अलीले ५२ रन जोडे पनि टिमलाई जिताउन सकेनन् । 

नेपालका लागि सन्दीप लामिछानेले ५, नन्दन यादवले २ तथा दिपेन्द्र सिंह ऐरीले १ विकेट लिए । 

यसअघि खेलमा टस हारेर पहिले ब्याटिङ गरेको नेपालले ९ विकेटको क्षतिमा १४७ रन बनायो । कप्तान रोहित पौडेलले ५८ तथा दिपेन्द्र सिंह ऐरीले २६ रन बनाए । गुल्सन झाले १६ तथा सोमपाल कामीले १४ रन बनाए । 

१४ रन जोड्दा नेपालले पहिलो विकेट गुमायो । कुशल भुर्तेल ६ रनमा आउट भए । 

नेपालले २५ रन जोड्दा ओपनिङ जोडी आसिफ शेखलाई गुमायो । शेख ११ रन बनाएर आउट भए । 

नेपालले ४८ रन जोड्दा तेस्रो विकेट गुमायो । कुशल मल्ल ८ रन बनाएर आउट भए । 

 नेपालले ११० रन जोड्दा चौथो विकेट गुमायो । दिपेन्द्र सिंह ऐरीले चौथो विकेटका लागि रोहितसँग मिलेर ६२ रनको साझेदारी गर्ने क्रममा २६ रन जोडे । 

नेपालले ११४ रन जोड्दा पाँचौँ विकेट गुमायो । अदिल आलम २ रनमा आउट भए । 

नेपालले ११५ रन जोड्दा छैटौँ विकेट गुमायो । कप्तान रोहित पौडेल ४१ बलमा ५८ रन जोडेर आउट भए । 

नेपालले ११६ रन जोड्दा सातौँ विकेट गुमायो । सन्दीप जोरा १ रन बनाएर आउट भए । 

नेपालले १३४ रन जोड्दा आठौँ विकेट गुमायो । गुल्सन झा ८ बलमा १६ रन बनाएर आउट भए । 

नेपालले १४७ रन बनाउँदा नवौँ विकेट गुमायो । सोमपाल कामी ८ बलमा १४ रन बनाएर आउट भए । 

कतारका डानियल लुइस र मिर्जा बेगले समान ३ विकेट लिए ।

नेपाल २ अंक बोनस अंकसहित सुपर सिक्समा पुगेको हो । सुपर सिक्सको पहिलो खेलमा नेपालले यूएईलाई हराएको थियो । नेपाल एक रनले विजयी भएको थियो । 

(शुरूआतमा शीर्षक अन्यथा भएकामा क्षमा चाहन्छौँ)