भू–उपयोग नियमावली तेस्रो संशोधन: देशभर रोकिएको कित्ताकाट खुल्ने
हाम्रा कुरा
प्रकाशित २०८२ कार्तिक २५ मंगलबार
1.2k
Shares
काठमाडौं। सरकारले भू–उपयोग नियमावली, २०७९ लाई तेस्रो पटक संशोधन गरेसँगै देशभर लामो समयदेखि रोकिएको जग्गा कित्ताकाट प्रक्रिया खुल्ने भएको छ। सोमबार बसेको मन्त्रिपरिषद्को बैठकले तेस्रो संशोधित नियमावली स्वीकृत गरेसँगै यसअघि अवरुद्ध रहेको जग्गा विभाजन तथा कित्ता छुट्याउने कार्य सञ्चालनमा आउनेछ।
सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलका अनुसार मन्त्रिपरिषद्ले भू–उपयोग (तेस्रो संशोधन) नियमावली, २०८२ स्वीकृत गरी आवश्यक प्रक्रियालाई अघि बढाउने निर्णय गरेको छ।
भू–उपयोग नियमावली जारी भएको तीन वर्ष बितिसक्दा पनि देशभरका ७५३ स्थानीय तहमध्ये २५३ पालिकाले मात्रै जग्गाको पूर्ण वर्गीकरण गरेका थिए। जग्गा वर्गीकरण नभएकै कारण करिब ५ सय पालिकामा कित्ताकाट रोकिएको थियो। यसअघि २०८१ भदौ २७ मा सरकारले नियमावली दोस्रो पटक संशोधन गर्दै जग्गा वर्गीकरणका लागि २०८२ असार मसान्तसम्मको समय थपेको थियो।
तेस्रो संशोधनले वर्गीकरणको प्रक्रियालाई सहज बनाउँदै कित्ताकाट खुल्ला गर्ने बाटो खोलेको हो।
