दृष्टिविहीन महिला टी–२० विश्वकपमा नेपाल उपविजेता, प्रधानमन्त्रीको बधाई [तस्बिरसहित]
हाम्रा कुरा
प्रकाशित २०८२ मंसिर ९ मंगलबार
615
Shares
काठमाडौँ । प्रधानमन्त्री सुशीला कार्कीले दृष्टिविहीन महिला टी–२० विश्वकपमा उपविजेता भएको टोलीलाई बालुवाटारमा बोलाएर बधाई दिएकी छिन् ।
प्रधानमन्त्री निवास बालुवाटारमा खेलाडी र अफिसियलसमेतलाई बोलाएर उनले पहिलो दृष्टिविहीन महिला टी–२० क्रिकेट विश्वकपमा इतिहास रचेकोमा बधाई दिइकी हुन् ।
नेपाली खेलकुदकै लागि ऐतिहासिक उपलब्धि र गौरवको विषय भन्दै उनले नेपाली दृष्टिविहीन महिला क्रिकेट टोलीलाई अझै उत्तरोत्तर प्रगतिको कामना पनि गरिन् ।
प्रशिक्षक पुरनसिंह खत्री र कप्तान गीता पौडेल नेतृत्वको नेपाली टोली हालै श्रीलंकामा भएको प्रतियोगितामा उपविजेता भएको हो । उनीहरुले साधनस्रोतले सम्पन्न मुलुकका टोलीलाई पनि जितेर दोस्रो हुन सकेको र सरकारको साथ पाए च्याम्पियनसमेत बन्नसक्ने बताए ।
टोली सोमबार काठमाडौँ फर्केको थियो ।
प्रथम दृष्टिविहीन महिला टी–२० विश्वकप क्रिकेटमा नेपाल उपविजेता बनेको हो । श्रीलंकाको कोलोम्बोस्थित पी सारा ओभल क्रिकेट ग्राउण्डमा आइतबार (मंसिर ७ गते) भएको फाइनल खेलमा भारतसँग पराजित हुँदै नेपाल उपविजेता भएको हो ।
नेपाल भारतसँग ७ विकेटले पराजित भएको हो । टस हारेर पहिले ब्याटिङको निम्तो पाएको नेपालले २० ओभरमा ५ विकेट गुमाएर एक सय १४ रन बनायो ।
नेपालका लागि सरिता घिमिरेले सर्वाधिक ३३ रन बनाइन् । बिमला राईले २६ रन बनाइन् ।
एक सय १५ रनको लक्ष्य भारतले १२.१ ओभरमै ३ विकेट गुमाएर पूरा गर्यो ।
भारतका लागि फुला सरेनले अविजित रहँदै ४४ रन बनाइन् भने करुना कुमारीले ४२ रन जोडिन् ।
नेपालले सेमिफाइनलमा पाकिस्तानलाई ७ विकेटले पराजित गर्दै फाइनलमा पुगेको थियो ।
