विराटनगर र लुम्बिनी भिड्दै, लायन्सलाई जित्नैपर्ने दबाब
हाम्रा कुरा
प्रकाशित २०८२ मंसिर १७ बुधबार
720
Shares
काठमाडौं। दोस्रो संस्करणको नेपाल प्रिमियर लिग (एनपीएल) अन्तर्गत २२औँ खेलमा आज विराटनगर किंग्स र लुम्बिनी लायन्स प्रतिस्पर्धा गर्दैछन्। यो खेल आज अपरान्ह ४ बजे त्रिवि क्रिकेट मैदान, कीर्तिपुरमा सुरु हुनेछ। दुवै टोलीले लिगमा आफ्नो छैटौँ खेल खेल्दैछन्।
विराटनगर किंग्सले यसअघिका पाँच खेलमध्ये चारमा जित र एउटामा हार बेहोरेको छ। ८ अंकसहित यो टोली अंक तालिकाको तेस्रो स्थानमा छ।
अर्कोतर्फ लुम्बिनी लायन्सले पाँच खेलमध्ये जम्मा २ खेलमा मात्रै जित निकालेको छ। ४ अंकका साथ लुम्बिनी लायन्स छैटौँ स्थानमा छ, जसले गर्दा प्लेअफको सम्भावना कायम राख्नका लागि लुम्बिनीलाई आजको खेल जित्नैपर्ने दबाब छ।
अंक तालिका
आठ टिम सहभागी एनपीएलमा अहिलेसम्म सुदूरपश्चिममात्र अपराजित रहेको छ । सुदूरले खेलेका पाँच ओटै खेल जितेको छ । सुदूर प्लेअफमा पुग्ने पहिलो टिम बनेको छ ।
काठमाडौँ गोर्खाज ६ खेलमा ८ अंकसहित दोस्रो स्थानमा रहेको छ । विराटनगर पाँच खेलमा चार खेल जितेर ८ अंकसहित तेस्रो स्थानमा छ । पोखरा एभेन्जर्स ५ खेलमा ४ अंकसहित चौथो स्थानमा छ । चितवन राइनोज ५ खेलबाट ४ अंकसहित पाँचौँ स्थानमा छ ।
लुम्बिनी लायन्स ५ खेलमा ४ अंकसहित छैटौँ स्थानमा छ । कर्णाली याक्स ६ खेलमा २ अंकसहित सातौँ स्थानमा छ । साविक विजेता जनकपुरमात्र ५ खेलबाट २ अंकसहित पुछारमा छ ।
