जापानमा हाइस्कूल विद्यार्थीमा 'ओभर द काउन्टर' औषधि दुरुपयोग बढ्दै
हाम्रा कुरा
प्रकाशित २०८२ मंसिर २८ आइतबार
1.8k
Shares
काठमाडौँ । जापानका हाईस्कुल विद्यार्थीहरूमध्ये करिब १० प्रतिशतले पछिल्लो वर्षमा चिकित्सकको सल्लाहविना सेवन हुने (ओभर द काउन्टर) औषधि बारम्बार प्रयोग गरेको बताएका छन्। यो तथ्याङ्कले युवामाझ गैर–प्रिस्क्रिप्सन औषधिको अत्यधिक प्रयोगबारे बढ्दो चिन्तालाई उजागर गरेको छ।
स्वास्थ्य मन्त्रालयको अनुसन्धान टोलीद्वारा सन् २०२४ आर्थिक वर्षमा गरिएको सर्वेक्षणअनुसार, दुरुपयोग अनुभव भएका विद्यार्थीमध्ये ४.६ प्रतिशतले दैनिक औषधि प्रयोग गरेको र ६.३ प्रतिशतले हप्तामा केहीपटक प्रयोग गरेको देखिएको छ। यी दुवै समूह मिलेर करिब १० प्रतिशत हुन्छ। अनुसन्धान टोलीले विद्यार्थीहरूलाई पछिल्लो वर्षमा ‘मूड बदल्न वा उत्तेजना पाउन’ औषधि निर्धारित मात्राभन्दा बढी वा बारम्बार प्रयोग गरेका थिए कि थिएनन् भनी सोधेको थियो।
सर्वेक्षणअनुसार, सबै हाईस्कुल विद्यार्थीमा औषधि दुरुपयोगको दर करिब १.४ प्रतिशत (अर्थात् ७० मध्ये १ जना) रहेको देखिएको छ। लिङ्ग अनुसार हेर्दा पुरुषमा ०.९ प्रतिशत र महिलामा १.७ प्रतिशत रहेको छ।
सेप्टेम्बर २०२४ देखि फेब्रुअरी सन् २०२५ सम्म सञ्चालन गरिएको यस सर्वेक्षणमा ५१ हजार विद्यार्थीले उत्तर दिएका थिए र यसमा पहिलोपटक औषधि दुरुपयोगको आवृत्ति पनि मूल्याङ्कन गरिएको छ। यो सर्वेक्षणले युवामाझ 'गैर–प्रिस्क्रिप्सन औषधि', विशेषगरी दुखाइ कम गर्ने औषधिको अत्यधिक प्रयोग बारे बढ्दो चिन्ता देखाएको छ।
स्वास्थ्य मन्त्रालयले प्रत्येक तीन वर्षमा हाईस्कुल विद्यार्थीबीच मदिरा सेवन, धूम्रपान र औषधि दुरुपयोग सम्बन्धी राष्ट्रिय सर्वेक्षण गर्दै आएको छ। सन् २०२१ को अघिल्लो सर्वेक्षणमा हाईस्कुल विद्यार्थीमध्ये १.६ प्रतिशतले गैर–प्रिस्क्रिप्सन औषधि दुरुपयोग गरेको पाइएको थियो, जुन करिब ६० मध्ये एक जना हुन्छ।
