काठमाडौँ । युक्रेनमा जारी युद्ध अन्त्यका लागि रुसी राष्ट्रपति भ्लादिमिर पुटिनसँग वार्ता गर्न सक्रिय हुने समय आएको भन्दै फ्रान्स र इटालीका नेताहरूले दबाब बढाएका छन्। यद्यपि, युरोपेली सङ्घ (ईयू) ले भने सोमबार युक्रेनमा वार्ताका लागि अझै अनुकूल वातावरण तयार भइनसकेको स्पष्ट पारेको छ।

ईयूकी प्रवक्ता पाउला पिन्होले कुनै न कुनै बिन्दुमा राष्ट्रपति पुटिनसँग संवाद गर्नुपर्ने कुरा स्वीकार गरे पनि हालसम्म मस्कोको तर्फबाट वार्ताका लागि कुनै सकारात्मक सङ्केत नदेखिएको बताएकी छन्। उनले अहिले धेरै कामहरू भइरहेको तर शान्तिको नेतृत्व गर्ने खालको वार्ताका लागि अझै समय परिपक्व नभएको उल्लेख गरेकी छन्।

इटालीकी प्रधानमन्त्री जर्जिया मेलोनीले गत शुक्रबार रुससँग उच्चस्तरीय वार्ता पुनः सुरु गर्ने बेला भइसकेको धारणा राखेकी थिइन् भने फ्रान्सका राष्ट्रपति इम्यानुएल म्याक्रोँले पनि क्रेमलिनसँग सम्पर्क स्थापित गर्न नयाँ 'फ्रेमवर्क' को आवश्यकता औँल्याएका थिए।

अमेरिकी राष्ट्रपति डोनाल्ड ट्रम्पले रुससँगको युद्ध अन्त्यका लागि व्यक्तिगत रूपमा पुटिनसँग पटक–पटक संवाद गरिरहेको र अमेरिकी वार्ताकारहरूले मस्कोसँग कैयौँ चरणको छलफल गरिसकेको सन्दर्भमा युरोपका यी दुई शक्तिशाली राष्ट्रहरूले यस्तो आह्वान गरेका हुन्। ट्रम्पको सक्रियतापछि युरोपले पनि आफ्नो प्रभाव बढाउन र किएभका लागि स्वीकार्य हुने खालको नयाँ शान्ति प्रस्ताव अघि सार्ने प्रयास गरिरहेको छ।

यद्यपि, पुटिनसँग वार्ता गर्ने विषयमा युरोपेली सङ्घभित्रै ठूलो चुनौती पनि देखिएको छ। विशेष गरी रुससँगको सीमा जोडिएका पूर्वी युरोपेली देशहरू मस्कोप्रति निकै आक्रामक र सतर्क रहेकाले उनीहरूको कडा प्रतिरोधको सामना गर्नुपर्ने स्थिति छ।

युरोप र युक्रेनले संयुक्त रूपमा अमेरिकासँग मिलेर शान्तिका लागि नयाँ योजनाहरू बुनिरहेका भए पनि रुसको तर्फबाट ठोस प्रतिबद्धता नआएसम्म ईयूको आधिकारिक संयन्त्र तत्कालै संवादको टेबलमा बस्न हिचकिचाएको देखिन्छ। यस घटनाक्रमले युक्रेन युद्धको समाधानका लागि वाशिङ्गटन, ब्रसेल्स र सदस्य राष्ट्रहरूका राजधानीबीच फरक–फरक रणनीति र कूटनीतिक दबाब सिर्जना गरेको छ।