नदीले गाडी बगाउँदा दुई बालबालिकासहित नौ जनाको मृत्यु
हाम्रा कुरा
प्रकाशित २०८२ माघ १० शनिबार
2k
Shares
तस्बिर फाइल
काठमाडौँ । दक्षिणी जिम्बाब्वेको माताबेलेल्यान्ड साउथ प्रान्तमा आएको भीषण बाढीमा एक सवारी साधन बग्दा नौ जनाको मृत्यु भएको छ। फिलाबुसी क्षेत्रको मुकुला गाउँ नजिकै रहेको त्शाङ्गामुटोपे नदी पार गर्ने क्रममा टोयोटा नोआ गाडी अचानक बढेको पानीको भेलमा परेर दुर्घटनामा परेको हो। नदीमा बहाव अत्यधिक भएकाले चालकले गाडी नियन्त्रणमा राख्न नसक्दा उक्त दुःखद घटना भएको प्रहरीले बताएको छ।
दुर्घटनामा सात जना वयस्क र दुई जना बालबालिकासहित नौ जनाको घटनास्थलमै डुबेर मृत्यु भएको छ। स्थानीय बासिन्दाको सहयोगमा प्रहरीले शुक्रबार सबै शवहरू नदीबाट बाहिर निकालेको थियो। मृतकहरूको पहिचान र कानुनी प्रक्रिया अगाडि बढाइएको प्रहरीले जनाएको छ। जिम्बाब्वेमा पछिल्ला महिनाहरूमा परेको मुसलधारे वर्षाका कारण हालसम्म ७० भन्दा बढी व्यक्तिको ज्यान गइसकेको छ भने बाढी र पहिरोले सडक तथा पुलजस्ता पूर्वाधारमा व्यापक क्षति पुर्याएको छ।
नदी र खोलाहरूमा पानीको सतह बढिरहेकाले जोखिमपूर्ण यात्रा नगर्न प्रहरीले सर्वसाधारणलाई आग्रह गरेको छ। सरकारले प्रभावित क्षेत्रहरूमा निगरानी बढाउँदै आपतकालीन उद्धार कार्यलाई तीव्र पारेको छ।
