एआई र डिजिटल ठगीविरुद्ध विश्वभरका प्रहरी एकै ठाउँमा
हाम्रा कुरा
प्रकाशित २०८२ माघ २१ बुधबार
2.1k
Shares
काठमाडौँ । इन्टरपोलको साइबर अपराध विज्ञ समूहको वार्षिक प्रत्यक्ष बैठक सोमबारदेखि हङकङमा जारी छ। दुई दिनसम्म जारी यस बैठकमा ३० भन्दा बढी देश तथा क्षेत्रका १२० भन्दा बढी कानुन कार्यान्वयन निकायका अधिकारी, उद्योग क्षेत्रका विज्ञ र अन्तर्राष्ट्रिय संस्थाका प्रतिनिधिहरू सहभागी छन्।
हङकङ प्रहरी बल र इन्टरपोलको संयुक्त आयोजनामा सुरु भएको यस बैठकको मुख्य विषय ‘साइबर अपराधको औद्योगिकीकरणलाई अवरुद्ध गर्ने’ रहेको छ। बैठकले विश्वव्यापी रूपमा बढ्दै गएको साइबर अपराधको चुनौतीलाई सामूहिक प्रयासबाट सामना गर्ने लक्ष्य राखेको छ।
उद्घाटन समारोहमा बोल्दै हङकङका प्रहरी आयुक्त चाउ यात–मिङले साइबर अपराध नियन्त्रणका लागि आधुनिक प्रविधिको विकास र सार्वजनिक-निजी साझेदारीमा जोड दिए। उनले विभिन्न सहकार्य प्लेटफर्ममार्फत सार्वजनिक सुरक्षा प्रणाली निर्माण गर्न हङकङ प्रहरी बल सधैँ प्रतिबद्ध रहेको बताए। साइबर अपराधविरुद्ध प्रभावकारी लडाइँका लागि सीमापार सहकार्य, बहु-क्षेत्रीय साझेदारी र निरन्तर क्षमतावृद्धि अत्यावश्यक रहेकोमा उनले विशेष जोड दिए। उनले प्रविधिको दुरुपयोग रोक्न अन्तर्राष्ट्रिय स्तरमै एकताबद्ध हुनुपर्ने धारणा राखे।
इन्टरपोलका साइबर अपराध निर्देशक निल जेटनले हङकङलाई अन्तर्राष्ट्रिय प्रहरी सहकार्यको महत्वपूर्ण केन्द्रका रूपमा चित्रण गरे। उनले यो बैठकले साइबर अपराध नियन्त्रणका लागि व्यावहारिक समाधान र सामूहिक कार्यलाई अझ प्रभावकारी रूपमा अघि बढाउने विश्वास व्यक्त गरे।
बैठकमा साइबर अपराध इकोसिस्टम, अनलाइन जबरजस्ती असुली, कृत्रिम बुद्धिमत्ताको प्रयोग तथा भर्चुअल सम्पत्ति ट्र्याकिङ जस्ता समसामयिक र जटिल विषयमा विस्तृत छलफल भइरहेको छ।
